ԵՐԵՎԱՆ, 24 հոկտեմբերի — Sputnik. Մեկ շաբաթ առաջվա իրավիճակի հետ համեմատ՝ հիմա որոշակի լարվածություն կա: Արցախում այսօր՝ հոկտեմբերի 24-ին լրագրողների հետ հանդիպման ժամանակ ասել է Պաշտպանության բանակի հրամանատար Լևոն Մնացականյանը՝ անդրադառնալով ադրբեջանական զինված ուժերի կողմից հոկտեմբերի 22-ին և 23-ին «ՍՊԱՅԿ» տիպի հեռակառավարվող հակատանկային հրթիռի կիրառմանը: Այս մասին հայտնում է «Արցախպրեսը»։
Նրա խոսքով` լարվածությունը պայմանավորված է Ադրբեջանի զինված ուժերի կողմից հրադադարի ռեժիմի խախտմամբ։ Մնացականյանը հիշեցրել է, որ հոկտեմբերի 19-ին ևս ադրբեջանական դիպուկահարի կողմից հայ զինծառայող է խոցվել:
«Մենք միշտ հայտարարել ենք, որ նրանց ամեն մի դիպուկահարին մենք պատասխանելու ենք, և պատասխան եղել է: Կարծում եմ՝ դա հենց կապված է դիպուկահարների պատերազմի արդյունքում առաջացած լարվածության հետ: Ադրբեջանը նաև երկու անգամ «ՍՊԱՅԿ» տիպի հեռակառավարվող հրթիռներ է կիրառել, երկու անգամ էլ հարվածներն անարդյունք են եղել»,- ասաց Լևոն Մնացականյանը:
ՊԲ հրամանատարը հնարավոր է համարում, որ աստիճանաբար լարվածության աճ լինի:
«Մենք արդեն տեղեկացրել ենք, որ եթե հետագայում նման հարվածներ լինեն, պատասխան լինելու է: Դեռևս կարծում ենք, որ «ՍՊԱՅԿ»-ին պատասխանելու անհրաժեշտություն չկա: Առաջիկա օրերին մենք հանդիպելու ենք ԵԱՀԿ Մինսկի խմբի ներկայացուցիչների հետ և քննարկելու ենք ստեղծված իրավիճակը»,- ասել է Մնացականյանը:
Հոկտեմբերի 23-ին Ադրբեջանի զինուժը երկու անգամ «ՍՊԱՅԿ» տիպի հեռակառավարվող հակատանկային հրթիռ է կիրառել:
