Ջազային դաշնակահար, կոմպոզիտոր և երգեհոնահար Գարի Քյոսայանը Sputnik Արմենիայի եթերում պատմել է հոկտեմբերի 28-ին «Արամ Խաչատրյան» մեծ համերգասրահում կայանալիք համերգի մասին։
Հոբելյանական բացառիկ համերգային երեկոյի ընթացքում հնչելու են նաև Գարի Քյոսայանի նոր ստեղծագործությունները:
Համերգին հատուկ հյուրի կարգավիճակով մասնակցելու են ամերիկացի տաղանդավոր ջազմեններ, «Գարի Քյոսայան ջազ քառյակի» անդամներ Լուիս վան Թեյլորը, Կարլ Վինսենտը, Դոնզել Դեվիսը, իսկ Հայաստանից՝ երաժիշտներ Նելլի Մանուկյանը, Ալլա Սահակյանը, Սոնա Ումրոյանը, Մարբեյը (Մարինե Հակոբյան):
Գարի Քյոսայանը եթերում պատմել է հետ պատահած հետաքրքիր մի դեպք։
«Մի անգամ Լոս Անջելեսում երեկոյան ես մոլորվեցի։ Այն ժամանակ բջջային հեռախոսներ չկային, զանգել չէի կարող։ Մեկ էլ տեսա, որ երեք սևամորթ են կանգնած ու ինձ հարցնում են` ինչքա՞ն փող ունես։ Ասացի` այսքան, ասացին՝ բա ինչո՞ւ այդքան քիչ, ի՞նչ ես անում, որ 300 դոլարից էլ պակաս ես վաստակում։ Ասացի` դաշնակահար եմ»,– պատմում է Քյոսայանը։
Ամերիկացիները նրան հրավիրել են արվարձանում գտնվող ինչ–որ բար, որտեղ սկսել է դաշնամուր նվագել, հետո հավաքվել է մի ամբողջ նվագախումբ։
«Մինչև գիշերվա 4-ը նվագեցինք, ինձ խմեցրեցին, հետո նաև հեռախոսահամարներ փոխանակեցինք, վերջում էլ նրանցից մեկն ինձ ասաց. «Եթե քեզ պետք է ինչ-որ մեկին վերացնել, ես քեզ համար առանց գումարի կվերացնեմ»»,– պատմում է կոմպոզիտորը։
