ԵՐԵՎԱՆ, 21 հոկտեմբերի — Sputnik. Հայ երգիչ, դերասան և ռեժիսոր Միքայել Պողոսյանը և հայտնի դերասան Արարատ Քեշյանը Տուլայում անցկացվող «Ժպտա, Ռուսաստան» կատակերգական ֆիլմերի վեցերորդ փառատոնի դափնեկիրներ են դարձել։ Այս մասին Պողոսյանը հայտնել է Facebook- ի իր էջում:
Սիրված դերասան Միքայել Պողոսյանը դափնեկիր է դարձել «Շնորհակալություն, հայրիկ» ֆիլմում մարմնավորած գլխավոր դերի համար: «Արևելքի ժպիտի համար» մրցանակը փակման արարողության ժամանակ ռեժիսորին հանձնել է ռուսական կինոյի լեգենդ համարվող դերասանուհի Ալլա Սուրիկովան:
Բացի Պողոսյանից, «Դասընկերուհիներ, նոր շրջադարձ» ֆիլմի համար «Լավագույն դերասան» մրցանակը շնորհվել է ռուսաստանաբնակ հայ դերասան Արարատ Քեշյանին:
«Ժպտա, Ռուսաստան»-ը երաժշտական և կատակերգական ֆիլմերի ամենամյա կինոփառատոն է, որի նախագահն է Ռուսաստանի ՌԴ ժողովրդական արտիստ, կինոռեժիսոր Ալլա Սուրիկովան։ Նա հայտնի է «Դարձեք իմ ամուսինը», «Մոսկովյան արձակուրդներ», «Փնտրեք կնոջը», «Մարդը Կապուցիների փողոցից», «Ուզում եմ բանտ նստել» և այլ ֆիլմերով: Փառատոնն անցկացվում է Ռուսաստանի մարզերից մեկում, որից հետո տարվա ընթացքում այն, որպես կինոյի փառատոն, կարող է անցկացվել Ռուսաստանի մի քանի քաղաքներում:
