ԵՐԵՎԱՆ, 20 հոկտեմբերի — Sputnik. Աշխարհի առաջին ռակետ, իսպանացի թենիսիստ Ռաֆայել Նադալի մարզիչ Թոնի Նադալը շվեյցարացի Ռոջեր Ֆեդերերին պատմության լավագույն թենիսիստ է անվանել, հայտնում է armsport.am-ը՝ հղում անելով «Cadena Ser»-ին:
Ներկա պահին Ռաֆայելի ակտիվում «Մեծ Սաղավարտի» մրցաշարերում 16 հաղթանակ կա, իսկ Ռոջերի ակտիվում` 19:
«Ես շատ քիչ մարզիկների գիտեմ, ովքեր կիշխեն այնպես, ինչպես Ռոջերը` թենիսում: Ռաֆան ընթացիկ մրցաշրջանը բարձրակարգ մակարդակով է անցկացնում: Վստահ եմ, որ նա նույնպես դասվում է պատմության լավագույն թենիսիստների շարքին:
Եթե Ֆեդերերը մոտակա տարիներին ավարտի կարիերան, իսկ Ռաֆան շարունակի հաղթել «Մեծ Սաղավարտի» մրցաշարերում, ապա մենք կրկին կարող ենք վերադառնալ պատմության լավագույն թենիսիստի մասին հարցին: Ամեն դեպքում, ներկա պահին լավագույնը հենց Ռոջերն է»,- Թոնի Նադալի խոսքն է մեջբերում «Cadena Ser»-ը:
