ԵՐԵՎԱՆ, 20 հոկտեմբերի — Sputnik. Լեհաստանի արտգործնախարարը Հայաստան կժամանի, որպեսզի Երևանին «դրական» տրամադրվածություն հաղորդի Եվրամիության հետ համաձայնագրի ստորագրման նախաշեմին, Sputnik Արմենիային ասաց քաղաքագետ Երվանդ Բոզոյանը:
Հոկտեմբերի 20-ին Լեհաստանի արտգործնախարար Վիտոլդ Վաշիկովսկին ժամանել է Երևան, որտեղ կհանդիպի ՀՀ նախագահ Սերժ Սարգսյանի և արտգործնախարար Էդվարդ Նալբանդյանի հետ։
Կարծում եմ, որ Հայաստան և Ադրբեջան այցի նպատակը կապված է «Արևելյան գործընկերության» հետ։ Լեհաստանը Շվեդիայի հետ համատեղ ծրագրի հեղինակներից մեկն է, ըստ էության, նրանք են «համակարգում» այն հետխորհրդային տարածքում»,– ասաց Բոզոյանը։
Նրա խոսքով` հավանաբար, Լեհաստանի արտգործնախարարը եկել է Երևանին և Բաքվին «դրական տրամադրվածություն» հաղորդելու նոր Համաձայնագրի ստորագրման համար։
Քաղաքական տեսանկյունից, նրա խոսքով, պատճառ չկա Հայաստանի և ԵՄ–ի միջև նոր համաձայնագիրը չստորագրելու համար։
«Հայաստանը ԵԱՏՄ անդամ է դարձել՝ այդպիսով կատարելով իր ընտրությունը։ Մյուս կողմից, նա փորձում է բազմավեկտոր քաղաքականություն վարել՝ հաշվի առնելով, որ այն չի խանգարի հայ-ռուսական հարաբերություններին»,– ասաց Բոզոյանը։
Ընդ որում, նա նշեց, որ համաձայնագիրն էապես տարբերվում է 2013 թվականի տարբերակից, և նրա ստորագրման հարցում ոչ մի հակասություն չկա։
«Արևելյան գործընկերություն» ծրագիրը Եվրամիության հետ ասոցացման հեռանկար էր նախատեսում։ Ծրագրվում էր, որ Երևանը ԵՄ-ի հետ ասոցացման ու ազատ տնտեսական գոտու մասին համաձայնագիրը կստորագրի 2013 թվականին Արևելյան գործընկերության վիլնյուսյան գագաթնաժողովի ժամանակ, սակայն դրանից երկու ամիս առաջ Հայաստանը հայտարարեց, որ մտադիր է Մաքսային միությանն անդամակցել ու մասնակցել եվրասիական ինտեգրմանը։ Հայաստանը Եվրասիական տնտեսական միությանը միացավ 2015 թվականի հունվարին։
Հայաստանը հույս ունի ստորագրել պայմանագիրը Արևելյան գործընկերության առաջիկա գագաթնաժողովին, որը տեղի կունենա 2017 թվականի նոյեմբերի 24-ին Բրյուսելում։
