ԵՐԵՎԱՆ, 19 հոկտեմբերի — Sputnik. Էլեկտրաէներգիայի թանկացման համար հիմքեր չկան, այսօր լրագրողների հետ հանդիպման ժամանակ ասաց Հայաստանի էներգետիկ ենթակառուցվածքների և բնական պաշարների նախարար Աշոտ Մանուկյանը։
«Սակագների բարձրացման համար առաջիկայում նախապայմաններ չեմ տեսնում», — նշեց նա։
Նրա խոսքով` գների նվազման նույնպես չարժե սպասել, որովհետև ատոմակայանի աշխատանքի երկարաժամկետ դադարեցումը կանդրադառնա ՀԷԿ-երի և ՋԷԿ-երի աշխատանքի արդյունավետության վրա։
«Ամենաէժան էներգիան տալիս է ատոմակայանը։ Իսկ 2018 թվականին ԱԷԿ-ի երկրորդ էներգաբլոկը կկանգնի 6 ամսով, 2009-ին` ևս 6.5 ամսով` կայանի աշխատանքի երկարաձգման ծրագրով։ Այդ պայմաններում էլեկտրաէներգիայի գինը զգալի ճնշում կզգա»,- ասաց Մանուկյանը։
Նա նշեց նաև, որ գնային քաղաքականության հարցով կառավարությունը չի զբաղվում։
Ըստ նրա` եթե կառավարությունը կամ էներգետիկ ենթակառուցվածքների ու բնական պաշարների նախարարությունը միջամտի սակագների ձևավորմանը, կխաթարվեն տնտեսական քաղաքականության հիմքերը:
Այդ պատճառով է կառավարությունն անկախ մարմին ստեղծել՝ Հանրային ծառայությունները կարգավորող հանձնաժողով։
Մանուկյանը խոսքով` հարցի վերջնական պատասխանը կտա այդ հանձնաժողովը։
