ԵՐԵՎԱՆ, 19 հոկտեմբերի — Sputnik. Այսուհետև Հայաստանից դեպի Ռուսաստան ոչ կանոնավոր ուղևորափոխադրումներ իրականացնելու համար պետք է թույլտվություն տան երկու երկրի լիազոր մարմինները։ Այս մասին Sputnik Արմենիայի հետ զրույցում ասաց Տրանսպորտի, կապի և տեղեկատվական տեխնոլոգիաների նախարարության փոխադրումների քաղաքականության բաժնի պետ Դավիթ Մելքոնյանը։
Հայաստանի Հանրապետության և Ռուսաստանի Դաշնության կառավարությունների միջև նախատեսվում է ստորագրել միջազգային ավտոմոբիլային հաղորդակցության մասին համաձայնագիր: Որոշման նախագծին այսօր հավանություն տվեց գործադիրի ղեկավար Կարեն Կարապետյանը։
«Այն կարգավորումները, որ մենք ունենք, վերահսկողություն և ուղևորների փոխադրման անվտանգություն չեն ապահովում։ Մեր համաձայնագիրը բավականին հին էր և չէր արտացոլում այն պայմաններն ու պահանջները, որոնք պահանջում էին հանրությունը և միջազգային օրենքի նորմերը»,- ասաց Մելքոնյանը։
Նրա խոսքով` փոխադրումներն իրականացվելու են մեկանգամյա թույլտվության պարագայում։ Թույլտվություն տալու հարցում լիազորված են համարվում Հայաստանի տրանսպորտի, կապի և տեղեկատվական տեխնոլոգիաների ու ՌԴ տրանսպորտի նախարարությունները։
«Համապատասխան իրավական ակտ կընդունվի, որի ապահովման դեպքում կտրամադրվի թույլտվությունը։ Նաև անվտանգության որոշակի դրույթներ ենք ամրագրելու։ Հայկական մեքենան Հայաստանից դուրս կգա, էլեկտրոնային եղանակով տեղեկությունը կտրամադրվի, թե ովքեր են անձնակազմը, վարորդները և ինչ քաղաքացիներ են մեկնում ՌԴ, նույնն էլ հակառակ ուղղությամբ»,-ասաց Մելքոնյանը։
Նրա խոսքով` այս համաձայնագիրը կօգնի բացառել փոխադրման ու մարդկային անվտանգության հետ կապված խնդիրները։
Ի դեպ, այս համաձայնագիրը բխում է ԵԱՏՄ պայմանագրի պահանջներից։
