ԵՐԵՎԱՆ, 19 հոկտեմբերի — Sputnik. Հայաստանում տեղակայված ռուսական ռազմակայանի տանկային ստորաբաժանումները «Ալագյազ» բարձլեռնային զորավարժարանում ամփոփիչ ստուգարքներ են հանձնում 2017 թվականի ուսուցման ամառային շրջանի համար:
ՌԴ Հարավային ռազմական օկրուգի մամուլի ծառայությունը հայտնում է, որ ստուգման ընթացքում Տ-72Բ տանկերի անձնակազմերը 125-միլիմետրանոց արկերով մինչև 4 հազար մետր հեռավորությունից հրաձգություն կիրականացնեն պայմանական հակառակորդի զրահավոր օբյեկտների վրա:
Տվյալ զորավարժարանում հրաձգության անցկացման առանձնահատկությունն այն է, որ այն գտնվում է ծովի մակերևույթից ավելի քան 2 հազար մետր բարձրության վրա և անձնակազմերից պահանջում է որոշակի ուղղումներ կատարել: Վարժանքներ կատարելիս տանկային անձնակազմերը տեղից և շարժման ընթացքում պետք է ոչնչացնեն պայմանական հակառակորդի հայտնվող և շարժվող թիրախները, այդ թվում՝ տանկեր, ցածր թռչող օդային թիրախներ, հրանոթներ և այլն:
Ստուգման ընթացքում հատուկ ուշադրություն է դարձվում մեծ հեռավորություններից թիրախների խոցման անձնակազմերի հմտություններին և բարդ ռելիեֆային տեղանքում տանկերի վարմանը: Ուսումնական միջոցառումներին ներգրավված են 200-ից ավելի զինծառայող և շուրջ 50 միավոր ռազմական տեխնիկա:
