ԵՐԵՎԱՆ, 19 հոկտեմբերի — Sputnik. Հայտնի դերասան Արմեն Ջիգարխանյանի ընտանիքում ծավալված իրադարձությունները նոր ընթացք են ստանում։ Արտիստն ասում է, որ կինը` Վիտալինա Ցիմբալյուկ-Ռոմանովսկայան, հրամայել է, որ դերասանին չթողնեն մտնել թատրոն։ Ջիգարխանյանն այս կապակցությամբ որոշել է հանդիպել Մոսկվայի քաղաքապետի հետ, գրում է «Կոմսոմոսկայա պրավդան»։
Պարբերականը ճշտել է, որ քաղաքապետի հետ հանդիպումն արդեն գրանցված է, Ջիգարխանյանը Սերգեյ Սաբյանինի հետ կհանդիպի այսօր` հոկտեմբերի 19-ին, 13։00-ից հետո։ ԽՍՀՄ ժողովրդական արտիստը քաղաքապետի հետ կզրուցի երկու թեմայով` կնոջը թատրոնից հեռացնելու և ֆինանսական ստուգում անցկացնելու մասին։
Ջիգարխանյանը նշել է, որ հիվանդանոցից դուրս գալուց հետո գնալու է թատրոն, որտեղ, ըստ նրա, դերասանի մուտքն արգելելու հրաման է արձակվել։
Հետո ինչ պիտի անի, դեռ չգիտի։ Պարբերականի հետ զրույցում դերասանն ասել է, որ հիմա ինքն այլևս ոչինչ չունի. կինն ամեն ինչ յուրացրել է։
«Նա ինքն է ամեն ինչ իր անունով դարձրել։ Սա մաֆիա է։ Կտեսնեք` նա կփախչի Ուկրաինա, չէ՞ որ նա ծնունդով Կիևից է։ Այս ամենը շատ ավելի լուրջ է, քան կարելի է պատկերացնել»,- ասել է Ջիգարխանյանը։
Դերասանը վճռական է տրամադրված։ Ասել է` եթե հարցը քաղաքապետի հանդիպումից հետո չլուծվի, գնալու է նախագահի մոտ։
Միաժամանակ նրա կնոջ` Վիտալինայի ներկայացուցիչը հայտնել է, որ կինը որոշել է ամուսնալուծվել։
