ԵՐԵՎԱՆ, 18 հոկտեմբերի — Sputnik. Քսենյա Սոբչակը 2018 թվականին Ռուսաստանի նախագահական ընտրություններում կառաջադրի իր թեկնածությունը: Այս մասին գրում են ռուսական լրատվամիջոցները։ Նա նամակ է հրապարակել sobchakprotivvseh.ru կայքում։
«Ես Քսենյա Սոբչակն եմ, 35 տարեկան: Իմ ամբողջ կյանքում ապրել և աշխատել եմ Ռուսաստանում և ինձ համար միևնույն չէ, թե ինչպիսին կդառնա իմ երկիրը: Գիտակցելով նման խնդրի բոլոր վտանգներն ու անհավանական բարդությունները՝ ես որոշեցի, որ իմ մասնակցությունը նախագահական ընտրություններին կարող է մեր երկրի համար այդքան անհրաժեշտ փոփոխությունների ճանապարհին քայլ լինել»,- գրել է Սոբչակը:
Նա վստահ է, որ իր առաջադրումը կարող է օգտակար լինել ընդդիմության և ամբողջ հասարակության համար:
Սոբչակը բացատրել է, թե ինչու պետք է հենց ինքը նախագահ դառնա` վստահեցնելով, որ դուրս է կոշտ գաղափարական շրջանակներից և չի պատկանում կոնկրետ կուսակցությունների, սահմանափակված չի կուսակցական կամ խմբային կարգապահությամբ։
