ԵՐԵՎԱՆ, 18 հոկտեմբերի — Sputnik. Հայտնի բարերար, գործարար Լևոն Հայրապետյանի մահն անսպասելի չէր։ Նախօրեին նրա ինքնազգացողությունը վատացել է, սակայն Հայրապետյանին այդպես էլ չեն տեղափոխել հիվանդանոց։ Այս մասին գրում է Sobesednik.ru-ն։
«Ճնշումը եղել է 84/44, բայց բավարարվել են բուժզննումով, Հայրապետյանին այդպես էլ չեն տեղափոխել բժշկական հաստատություն»,- գրում է պարբերականը։
Դատական հերթական նիստը, որի ժամանակ պետք է քննարկվեր Հայրապետյանի պաշտպանի բողոքարկումը, նախատեսված էր հոկտեմբերի 18-ին։ Հայրապետյանին մերժել էին պայմանական-վաղաժամկետ ազատ արձակել, թեև նա առողջական բազմաթիվ խնդիրներ ուներ։
Ավելի վաղ տեղեկություն էր տարածվել, որ Հայրապետյանը տնային կալանքի տակ է։
Նշվում է, որ նրան մերժել են պայմանական-վաղաժամկետ ազատ արձակել, քանի որ «խախտել է համազգեստի կրման կանոնը և չի կրել «բեյջը», որի վրա գրված է ազգանունը»։
Հայրապետյանի դուստրը պատմել է, որ հոր վերջին ցանկությունը եղել է այն, որ թաղվի Մոսկվայում, ծնողներին կողքին։
Լևոն Հայրապետյանի հարազատները չեն համաձայնել հետմահու դադարեցնել Բաշկիրիայի վառելիքաէներգետիկ համալիրի բաժնետոմսերը յուրացնելու մեղադրանքով նրա դեմ հարուցված քրեական գործը: Այդ մասին հայտնել է նրա փաստաբան Դավիդ Խեչանը:
«Մեղադրյալի մահվան առնչությամբ գործի դադարեցման մասին խոսք լինել չի կարող»,- ասել է փաստաբանը:
Լևոն Հայրապետյանը մահացել է այսօր` հոկտեմբերի 18-ին, կյանքի 68-րդ տարում։
Նա ձերբակալվել էր դեռևս 2014 թվականին ու դատապարտվել 4 տարվա ազատազրկման:
Նրա դեմ հարուցված քրեական գործի հիմքում նախկին սենատոր Իզմեստևի և նրա մոր ցուցմունքներն էին: Դրանց համաձայն՝ Հայրապետյանն Իզմեստևի մորից 700 հազար դոլար էր վերցրել նրա որդու նկատմամբ դատավճռի մեղմացմանն աջակցելու խոստումով, սակայն չէր կատարել խոստումը։
Դատարանի վճռով Լևոն Հայրապետյանը մեղավոր է ճանաչվել 700 հազար դոլարի խարդախության մեջ։
Ծագումով արցախցի Լևոն Հայրապետյանն Արցախի ամենախոշոր ներդրողներից էր։ 16 տարի առաջ նրա տրամադրած ֆինանսական միջոցներով վերակառուցվել է 13-րդ դարի հայտնի Գանձասարի վանական համալիրը։
Նրա օգնությամբ Արցախում կառուցվել է փայտամշակման գործարան, հանգստյան գոտիներ ու դպրոց։
Լևոն Հայրապետյանը հոգացել է նաև «Հյուսիս-Հարավ» ավտոմայրուղու մի հատվածի շինարարության ծախսերը։ Դա այն հատվածն է, որն անցնում է Գանձասարի վանական համալիրի շրջակայքով։
7 մլն դոլար էլ տրամադրել է Մարտակերտում ջրամբարի կառուցմանը։
