ԵՐԵՎԱՆ, 18 հոկտեմբերի — Sputnik. Անցած շաբաթվա 5 աշխատանքային օրվա ընթացքում բնապահպանության և ընդերքի տեսչությունը հայտնաբերել և բացահայտել է բնության դեմ ուղղված իրավախախտումների 29 դեպք։ Այս մասին Sputnik Արմենիային հայտնեց ՀՀ բնապահպանության և ընդերքի տեսչության պետ Վրույր Պեպանյանը`նաև որոշ մանրամասներ ներկայացնելով կատարված խախտումներից։
29 դեպքից 14-ը, նրա խոսքով, վերաբերում են ապօրինի ծառահատման և փայտանյութի տեղափոխման դեպքերին, 5-ը`խեցգետնի, ձկան, կաքավի, լորի ապօրինի որսագողության դեպքերին, մնացածները` օդի և հողի աղտոտմանը։
Հայտնաբերված դեպքերով բնությանը հասցված վնասը հաշվարկվել է 1.414.900 դրամ:
«Խախտումների ու դրանց հետևանքով բնությանը հասցված վնասի գերակշիռ մասը վերաբերում է անտառահատումների դեպքերին»,- ասաց Պեպանյանը` հավելելով, որ հաշվարկված վնասից 1.210.000 դրամն արդեն վճարվել է բյուջե։
Մնացած 200 000 դրամի մասով վարույթները դեռ ընթացքի մեջ են։
