ԵՐԵՎԱՆ, 18 հոկտեմբերի — Sputnik. Գյումրիում տեղակայված ռազմական կայազորում` «Սև բերդի» տարածքում, նշեցին Նիկոլայ I- ի կառուցած եկեղեցու հիմնադրման 180-ամյակը։ Այս մասին հայտնում է Հարավային ռազմական օկրուգի մամուլի ծառայությունը:
Տոնական միջոցառմանը հրավիրված էին զինվորականներ, նրանց ընտանիքների անդամներ, Ռուսաստանի Դաշնության և Հայաստանի Հանրապետության ուժային կառույցների, դիվանագիտական կորպուսի, հոգևոր դասի և Շիրակի մարզպետարանի ներկայացուցիչները:
Հայաստանում 102-րդ ռուսական ռազմակայանի հրամանատարի` հավատացյալների հետ աշխատանքի գծով օգնական, վարդապետ Անդրեյը (Վաց) Սբ. Նահատակ Ալեքսանդրայի եկեղեցում անցկացրեց պատարագ և հոգեհանգիստ ամրոցի զինվորների համար: Հրամանատարական կազմը հյուրերի հետ ծաղկեպսակներ ու ծաղիկներ դրեց ամրոցի առաջին հրամանատար, գեներալ-մայոր Ֆյոդոր Գուբսկու հուշարձանին:
Տոնական միջոցառումն ավարտվեց հոգևոր և ռազմահայրենասիրական երգերով, հյուրերն այցելեցին ռազմակայանի թանգարան ու «Զինվորական փառք» հուշահամալիր:
Սուրբ նահատակ Ալեքսանդրա թագուհու եկեղեցին գտնվում է 102-րդ ռուսական ռազմակայանի «Սև բերդի» տարածքում: Շինարարության նախագիծը հաստատվել է 1836 թվականին կայսր Նիկոլայ I-ի կողմից:
1837 թ-ին ամրոց է ժամանել Ռուսաստանի կայսրը: Նրա կնոջ` Ալեքսանդրա Ֆեոդորովնայի պատվին ամրոցը կոչվեց «Ալեքսանդրապոլ»:
1837 թ. հոկտեմբերի 4-ին կայսր Նիկոլայ I-ի անձնական ներկայությամբ դրվեց եկեղեցու հիմքը: Նախագիծը մշակել էր ինժեներ-գնդապետ Ռուդենկովը: Ըստ նախագծի` տաճարը նախատեսված է 800 զինվորի համար: Շինարարությունը տևեց 5 տարի: Եկեղեցին օծվեց 1842թ-ին:
