ԵՐԵՎԱՆ, 17 հոկտեմբերի — Sputnik. Վրաստանում Հայաստանի դեսպանի թեկնածուներից մեկը ՀՀ կապի և տրանսպորտի նախկին նախարար Գագիկ Բեգլարյանի սանիկն է` նախկին պատգամավոր Ռուբեն Սադոյանը։ Sputnik Արմենիային այս մասին հայտնեցին սեփական աղբյուրները։ Նրա թեկնածությունը քննարկվում է նաև կուլուարներում։
Հայտնի է, որ Սադոյանին ակտիվորեն «առաջ է մղում» Գագիկ Բեգլարյանը, որը լավ կապեր ունի Վրաստանի քաղաքական վերնախավի, ընկերական հարաբերություններ` Վրաստանի գործող վարչապետ Գեորգի Կվիլիկաշվիլու հետ։
Զարմանալի չէ, որ Բեգլարյանը զբաղվում է Սադոյանի «հարցով», քանի որ Հայաստանում դեռ գործում է խնամի-ծանոթ-բարեկամ սկզբունքը։ Սադոյանի դեպքում հայտնի է, որ նա բիզնես-հետաքրքրություն ունի Վրաստանում։
Վրաստանում դեսպանի աթոռը զբաղեցնելու համար մղվող պայքարում ընդգրկվել է նաև ՀՀ արտգործնախարարությունը։ ԱԳՆ-ն ուզում է իր մարդուն առաջ մղել, որի հետ ավելի հեշտ կլինի լեզու գտնել։ Որոշ տվյալներով, ԱԳՆ-ի «մարդը» կլինի գերատեսչության բարձրաստիճան պաշտոնյաներից մեկը։
Դեսպանի թեկնածուների ցանկում շոշափվում է նաև նախկին պատգամավոր Վարդան Այվազյանի անունը։ ԶԼՄ-ների տվյալով, նա ձկնաբուծական տնտեսություն ունի այնտեղ, ինչպես նաև «Ապաթխուրի» հանգստի գոտու համասեփականատերերից մեկն է։
Հիշեցնենք, որ Վրաստանում Հայաստանի դեսպանի թեկնածու էր առաջադրվել Կովկասի ինստիտուտի տնօրեն Սերգեյ Մինասյանը։ Նրա նշանակումը ձգձգվեց։ Պաշտոնական մերժում առայժմ չկա, բայց հայկական և վրացական լրատվամիջոցներն արդեն մի քանի շաբաթ շարունակ քննարկում են նրան ագրեման չտալու հարցը։
Ավել վաղ փորձագետները նշել էին, որ Մինասյանի թեկնածությունը «դուր չի եկել» Բաքվին ու Անկարային։ Նշվել էին նաև Թբիլիսի խնդիրները` Վրաստանում Մինասյանին համարում են Մոսկվայի դրածոն, ինչն այնտեղ հավասարազոր է «պերսոնա նոն գրատա» կարգավիճակին։
