ԵՐԵՎԱՆ, 17 հոկտեմբերի — Sputnik, Նելլի Դանիելյան. Հայաստանում բիզնեսի խոշորացման միտում չկա։ Պատասխանելով բակային փոքր խանութների փոխարեն օրեցօր ավելացող սուպերմարկետների մասին ահազանգերին`հարկային տեսչության պատասխանատուները նշում են, որ մանր ու միջին բիզնեսով զբաղվողների թիվը վերջին տարիներին էապես չի փոխվել։
ՊԵԿ վարչարարության մեթոդաբանության, ընթացակարգերի և սպասարկման վարչության պետ Արման Պողոսյանը վկայակոչում է պաշտոնական վիճակագրությունը։
«Ակտիվ հարկ վճարող փոքր ձեռնարկատերերի թիվը շուրջ 50 000 է, և ունենք ևս 20 000 ավելի խոշոր հարկ վճարողներ, որը ևս էական փոփոխության չի ենթարկվել»,– ասում է Պողոսյանը` միաժամանակ չթաքցնելով, որ խոշոր խանութների առկայությունը կարող է հանգեցնել նաև տնտեսական մրցակցության չարաշահման խնդիրների։
«Մեզ ծանոթ է ձեր բարձրացրած խնդիրը, հատկապես` տնտեսական մրցակցության կոնտեքստում, թե արդյոք շուկայում առկա է գերիշխող դիրք, արդյոք փոքրերն ունեն մեծերի հետ հավասար մրցակցելու հնարավորություն, թե չէ։ Բայց մեր դիտարկմամբ` նման խնդիր չկա, և մեր քաղաքականությունն ուղղված է ՓՄՁ–ների համար առավել մեղմ հարկային միջավայր ստեղծելուն»,– ասում է Պողոսյանը։
Հետաքրքրական է, որ ՊԵԿ–ի տրամադրած պաշտոնական վիճակագրությամբ` այս տարի 1600–ով ավելացել է միկրոձեռնարկատերերի, մասնավորապես` ինքնազբաղված մարդկանց թվաքանակը։
Հագուստի արտադրությամբ ու վերանորոգմամբ, փայտյա իրերի, կահույքի պատրաստմամբ, կենցաղային տեխնիկայի վերանորոգմամբ, լեզուների ուսուցմամբ և հյուրատնային ծառայություններ մատուցող 1600 ինքնազբաղված անձանց` հարկային մարմնում գրանցվելու ցանկությունն ունի իր հիմնավորումը։ Բանն այն է, որ այս տարի ինքնազբաղվածներին որոշել են ազատել բոլոր տեսակի հարկերից, եթե նրանց տարեկան շրջանառությունը չի գերազանցում 9 մլն դրամը, և եթե ինքնազբաղվածը չունի վարձու աշխատող։
