ԵՐԵՎԱՆ, 15 հոկտեմբորի — Sputnik. Հոկտեմբերի 12-ից 14-ը ՌԴ Սանկտ-Պետերբուրգ քաղաքում ընթացող «Ինվետեքս 2017» միջազգային զբոսաշրջային ցուցահանդեսում ադրբեջանական պատվիրակությունը հերթական սադրանք է իրականացրել արցախյան պատվիրակության նկատմամբ՝ պահանջելով դադարեցնել Արցախյան տաղավարի գործունեությունը:
Այս մասին տեղեկությունները մեզ հետ զրույցում հաստատեց ԼՂ մշակույթի, երիտասարդության հարցերի և զբոսաշրջության նախարարության Աշխատակազմի ղեկավար Բեգլար Քարամյանը:
«Ցուցահանդեսի վերջին օրը մի խումբ ադրբեջանցիներ փորձել են տեղում խոչընդոտել Արցախի տաղավարի աշխատանքները՝ լարվածություն ստեղծելով տաղավարի շուրջ։ Սակայն ձեռնարկված միջոցառումների շնորհիվ հաջողվել է կասեցնել նաև այդ սադրանքը և ցուցահանդեսի անվտանգության աշխատակիցների ուղեկցությամբ ադրբեջանցիները դուրս են հանվել ցուցահանդեսի տարածքից»,- հայտնեց արցախցի պաշտոնյան՝ նշելով, որ միջադեպի այլ մանրամասներ այս պահին հայտնի չեն:
«Պատվիրակությունը վաղը կվերադառնա Արցախ և ավելի մանրամասն կներկայացնի տեղի ունեցածը»,- ասաց նա:
Այդուհանդերձ, ադրբեջանիցիներին չի հաջողվել փակել Արցախի տաղավարը: Արցախը մինչև վերջին րոպեն մասնակցել է ցուցահանդեսին։
Տաղավարում ներկայացված է եղել և ցուցահանդեսի այցելուներին է բաժանվել մեծ քանակությամբ զբոսաշրջային գրականություն, տեսահոլովակներով սկավառակներ, քարտեզներ, Արցախ այցելելու ու շրջաայություններ կազմակերպելու հնարավորություններ։
