ԵՐԵՎԱՆ, 15 հոկտեմբերի — Sputnik. Հայ տնտեսվարողների համար ուժի մեջ են մտնելու արտահանման նոր կանոններ՝ պայմանավորված ԵԱՏՄ մաքսային ընդհանուր սկզբունքներին անցնելու հետ: ՀՀ Սննդամթերքի անվտանգության պետական ծառայությունը հայ արտահանողներին և արտադրողներին աշխատանքային նոր պահանջները ներկայացնելու համար հանդիպում է կազմակերպել «HACCP project» խորհրդատվական ընկերության տնօրեն Նիկիտա Չապայկինի հետ:
Հանդիպման ընթացքում Չապայկինը գործարարներին մասնավորապես ասել է. «Իրականում բարդ բան չկա, ոչ մի նոր պահանջ չի ավելացել. պետք է կատարել սանիտարահիգիենիկ նորմերով սահմանված պահանջները, ինչպես օրինակ՝ պայքարել կրծողների, միջատների դեմ և հետևել HACCP 7 հիմնական սկզբունքներին (վտանգի աղբյուրների վերլուծություն, հսկման կրիտիկական կետերի հատկորոշում, կրիտիկական յուրաքանչյուր կետի համար կրիտիկական սահմանի որոշում, մոնիտորինգի համակարգի մշակում, ուղղիչ գործողությունների սահմանում, ստուգման ընթացակարգի սահմանում և փաստաթղթավորման և գրանցումների համակարգի ստեղծում)»:
HACCP համակարգն ապահովում է վերահսկողություն սննդամթերքի արտադրության բոլոր փուլերում, արտադրության գործընթացի ցանկացած կետում:
