ԵՐԵՎԱՆ, 14 հոկտեմբերի — Sputnik. Միացյալ Նահանգների նախագահ Դոնալդ Թրամփը հայտարարել է, որ Իրանը շարունակում է մնալ ահաբեկչության գլխավոր հովանավորը, քանի որ կապված է «Ալ Քաիդայի», «Թալիբանի» և այլ կազմակերպությունների հետ, հաղորդում է ՌԻԱ Նովոստին:
«Ռեժիմը մնում է ահաբեկչության առաջատար հովանավորը և օգնում «Ալ Քաիդային», «Թալիբանին» «Հզբոլլահին» և այլ ահաբեկչական ցանցերին: Նա զարգացնում և տեղադրում է հրթիռներ` խախտելով միջազգային նորմերը, որոնք սպառնում են մեզ և մեր դաշնակիցներին»,— ասել է Թրամփը:
Նա հայտարարել է, որ Իրանը բազմիցս խախտել է միջուկային զենքի մասին համաձայնագրի դրույթները: ԱՄՆ նախագահը հրաժարվել է հաստատել Կոնգրեսին, որ Իրանը կատարում է միջուկային համաձայնագրով սահմանված կետերը:
Թրամփը հայտնել է, որ Ամերիկայի Միացյալ Նահանգները մտադիր է ընդլայնել Իրանի նկատմամբ պատժամիջոցները։
