ԵՐԵՎԱՆ, 14 հոկտեմբերի, Sputnik. Russia Today-ի գլխավոր խմբագիր Մարգարիտա Սիմոնյանը հայտարարել է, որ պատրաստ է ողջունել Ռուսաստանի ցանկացած քայլ ի պատասխան ԱՄՆ-ում RT-ի ճնշմանը, միայն թե թույլ տան, որ հեռուստաընկերությունը շարունակի աշխատել հանգիստ ռեժիմով:
Ավելի վաղ Ռուսաստանի արդարադատության նախարարությունը խոսել էր պատասխան գործողությունների մասին` հայտարարելով, որ հնարավոր է` արևմտյան մի շարք ԶԼՄ-ների դեպքում սահմանափակումներ կիրառվեն: Սահմանափակումները կարող են ազդել, մասնավորապես, «Ազատություն» ռադիոկայանի, «Նովոյե վրեմյա» հերուստաալիքի, «Idel.Realii» հեռուստաալիքի աշխատանքի վրա: Ընդ որում, Արդարադատության նախարարությունը զգուշացրել էր, որ «հայելային միջոցների» սկզբունքը ապագայում նույնպես կկիրառվի` կախված նրանից, թե Ամերիկայի Միացյալ Նահանգներն ինչ միջոցներ կձեռնարկի ռուսաստանյան լրատվամիջոցների դեմ:
«Ես շարունակում եմ լրագրող մնալ: Այդ տեսանկյունից կուզեի, որ լրագրողներն ամենուրեք ազատ աշխատեն` Ռուսաստանում, Ամերիկայում և ամենուր: Միևնույն ժամանակ, ես` որպես կազմակերպության ղեկավար, կողջունեմ ցանկացած միջոց, որը կստիպի մեզ հանգիստ թողնել և թույլ կտա շարունակել մեր լրագրողական աշխատանքը», — ասել է Սիմոնյանը ТV Ցենտր հեռուստաընկերության «Իմանալու իրավունք» ծրագրի եթերում:
RT-ի գլխավոր խմբագիրն ընդգծել է, որ ինքը չի զբաղվում միջպետական հարաբերություններով, մինչդեռ փոխադարձ քայլերի հարցը բացառապես այդ հարթությունում է գտնվում:
«Եթե հնարավոր է ինչ-որ բան անել, որ մեզ հանգիստ թողնեն, ուրեմն եկեք անենք դա: Եթե ոչինչ հնարավոր չե անել, ուրեմն եկեք այս իրավիճակում գոյատևելու այլ ուղիներ փնտրենք: Ես պատերազմ հանուն պատերազմի չեմ ուզում, ես ուզում եմ, որ բոլորը խաղաղ ապրեն, նորմալ աշխատեն և մարդկանց պատմեն այն ճշմարտությունը, որը նրանք անհրաժեշտ են համարում պատմելու համար », — ավելացրել է Սիմոնյանը:
ԱՄՆ-ն հանձնարարել RT-ին սպասարկող ընկերությունը մինչև հոկտեմբերի 17-ը գրանցել որպես օտարերկրյա գործակալ: Հեռուստաալիքի գլխավոր խմբագիր Մարգարիտա Սիմոնյանի խոսքով, RT-ն նման ճնշման չի արժանացել ուրիշ ոչ մի երկրում, ինչպես ԱՄՆ-ում:
