ԵՐԵՎԱՆ, 14 հոկտեմբերի – Sputnik. Ծիծեռնակաբերդի այգին բարեկարգելու և այդ տարածքում «Հայ Պարկ» կառուցելու նախագիծը դեռ քննարկման փուլում է։ Sputnik Արմենիային ասաց «Երևան իմ սեր» հիմնադրամի տնօրեն Արշակ Կարապետյանը։
«Հիմնադրամի պատվերով բրիտանական հայտնի դիզայներական ընկերությունը նախնական էսքիզներ է մշակել։ Նպատակը Ծիծեռնակաբերդի այգին բարեկարգելն է, որովհետև դա Երևանի միակ կանաչ տարածքն է, որը կարող է շուրջ 100 հա ընդհանուր կանաչ տարածություն ունենալ»,-ասաց Կարապետյանը։
Ի դեպ, նույն տարածքում նախատեսվում էր կառուցել նաև տարիներ առաջ լայն քննարկման արժանացած Սփյուռքի թանգարանի շենքը։ Նախագծի մեծ մասշտաբների պատճառով, հիմնադրամի տնօրենի խոսքով, այն դեռ քննարկումների կարիք ունի, ուստի Կարապետյանը դժվարացավ նշել, թե երբ կկառուցվի թանգարանի շենքը։
