ԵՐԵՎԱՆ, 13 հոկտեմբերի — Sputnik. ՀԱՊԿ Օպերատիվ արձագանքման հավաքական ուժերը Հայաստանի և Ռուսաստանի միացյալ խմբավորման հետ համատեղ ավարտեցին Հայաստանի տարածքում անցկացվող զորավարժությունները։
Ինչպես նշեց ՀԱՊԿ միացյալ շտաբի պետ, գեներալ–գնդապետ Անատոլի Սիդորովը, «Բաղրամյան» զորավարժարանում ոչ միայն զինվորական ստորաբաժանումների միջև էր կազմակերպվել փոխգործակցություն, այլև ոստիկանության, ԱԻՆ–ի և այլ կառույցների։
«Այն արդյունքներն ու նպատակները, որոնք դրել էինք մեր առջև, իրականացրեցինք։ Առջևում նոր փուլ է` ՀԱՊԿ խաղաղապահ ուժերի հետ զորավարժությունների անցկացում։ Դրանից հետո ի հայտ կգան բոլոր թերությունները, որոնք պետք է վերացնել` ՀԱՊԿ հավաքական ուժերի արդյունավետությունը բարձրացնելու համար», – ասաց Սիդորովը։
ՀՀ պաշտպանության նախարար Վիգեն Սարգսյանն իր հերթին հայտարարեց, որ շատ գոհ է արդյունքներից։
«Սրանք կարևոր զորավարժություններ են, առանձնահատկությունը նրանում է, որ բոլոր փուլերը փոխկապակցված են», – ասաց նա։
Նախարարի խոսքով` զորավարժություններին մասնակցող ՀԱՊԿ զինծառայողների թիվը կազմել է 2.5 հազար մարդ։ Բացի ԱԻՆ–ի և ոստիկանության ներկայացուցիչներից, զորավարժություններին մասնակցել են նաև Կարմիր խաչի միջազգային կոմիտեի ներկայացուցիչները։
«Կշարունակենք աշխատանքը ՀԱՊԿ շրջանակներում, այն Հայաստանի անվտանգության կարևորագույն տարրերից մեկն է։ Մենք միշտ հանդես ենք եկել որպես մի երկիր, որն առաջ է տանում համագործակցությունը` լրացուցիչ իմաստ հաղորդելով դրան», – ասաց նախարարը։
Նա նշեց, որ փոխգործակցությունը ՀԱՊԿ–ի շրջանակներում բխում է ոչ միայն Հայաստանի միջազգային պարտավորություններից, այլև անվտանգության շահերից։
Հայաստանի տարածքում պրակտիկ գործողությունների եզրափակիչ խաղարկությանը մասնակցեցին ՀԱՊԿ անդամ–երկրների ԶՈՒ մոտոհրաձգային, հրետանային, օդա–դեսանտային ստորաբաժանումները։ Նրանց հետ համատեղ գործում էին նաև ուղղաթիռներ և ինքնաթիռներ գրոհային, կործանիչ և բանակային ավիացիայի, ազգային գվարդիաների, ոստիկանության և ԱԻՆ ստորաբաժանումներ։
Պրակտիկ գործողություններին մասնակցեցին նաև Կարմիր խաչի միջազգային կոմիտեի ներկայացուցիչները` մարդասիրական օգնություն ցուցաբերելու խնդրի կատարմամբ։ Որպես դիտորդ զորավարժություններին հրավիրված էին միջազգային և տարածաշրջանային կազմակերպությունների, ԶԼՄ–ների ներկայացուցիչներ։
«Մարտական եղբայրություն» օպերատիվ ռազմավարական զորավարժությունների հաջորդ փուլը կանցկացվի Ղազախստանի տարածքում, խաղաղապահ գործողությունների ընթացքում հետհակամարտական կարգավորման խնդրով։
