ԵՐԵՎԱՆ, 13 հոկտեմբերի — Sputnik, Նելլի Դանիելյան. Բնապահպանության նախարար Արծվիկ Մինասյանն այսօր աշխատանքային շրջայց է կատարել Դիլիջանի ազգային պարկի տարածքում։
Երեկոյան 21։00-ի սահմաններում հասնելով Շամախյան տեղամաս, նախարարն ու ԲՆ աշխատակիցները տեսել են, որ այրվում է «Պանտերա» ընկերությանը պատկանող անվտանգության աշխատակիցների տնակը։
Այդ մասին Sputnik Արմենիային հայտնեց բնապահպանության նախարարի մամուլի խոսնակ Մարինե Կարապետյանը՝ տրամադրելով դեպքի վայրում նկարահանած տեսանյութը։
«Այս պահին այստեղ են նաև հրշեջները։ Նրանք արդեն պայքարում են կրակի դեմ, բայց այլ մանրամասներ դեռ հայտնի չեն։ Մեզ հետ են նաև «Պանտերայի» ղեկավարները, որոնք ևս տեղյակ չեն կատարվածից»,- ասաց Մարինե Կարապետյանը։
Հիշեցնենք, որ բնապահպանության նախարարությունը «Դիլիջան» ազգային պարկում պահպանության ռեժիմը խստացնելու եւ ավելի արդյունավետ դարձնելու նպատակով պարկի պահպանությունը վստահել է մասնավոր պահնորդական «Պանտերա սեքյուրիթի» ՍՊԸ-ին։ Նման դեպք ՀՀ հատուկ պահպանվող տարածքում առաջին անգամ է կիրառվում։
Sputnik Արմենիայի թղթակցին արտակարգ իրավիճակների նախարարությունը հայտնել է, որ հրդեհից տուժածներ չկան։ Տեղեկացրել են նաև, որ հրշեջներին հաջողվել է մեկուսացնել ու մարել հրդեհը, կրակն անտառին չի հասել։
