ԵՐԵՎԱՆ, 13 հոկտեմբերի — Sputnik. Դիլիջան ազգային պարկի՝ արդեն նախկին տնօրեն Աշոտ Դավթյանը հայտնվել է Դիլիջանի դատարանի մեղադրյալի աթոռին։ Նրան մեղադրում են իրեն վստահված բնության հատուկ պահպանվող տարածքում մեռած հոգիների հետ ծառահատումներ «կազմակերպելու» մեջ։
Բանն այն է, որ քննչական մարմինները բացահայտել են, որ Դավթյանն իր աշխատակիցներին հանձնարարել է Դիլիջանի անտառում հատված ծառերի վերաբերյալ արձանագրությունները ձևակերպել մահացած անձանց անուններով, ապա ինքն էլ ստորագրել ու կնքել է կեղծ արձանագրությունները և ուղարկել բնապահպանական պետական տեսչություն։
Այդ փաստերով քրեական գործը հարուցվել էր դեռ 2014 թ.–ին։ Հանցանքը կատարվել է 2011-14 թ.թ.–ին։ Այդ ժամանակ համապատասխան մարմինների կատարած ստուգումների համաձայն՝ ազգային պարկի տարածքում ապօրինի հատվել էր 770 ծառ։ Պետությանը պատճառած վնասը հաշվարկվել էր մոտ 120 միլիոն դրամ:
