ԵՐԵՎԱՆ, 12 հոկտեմբերի — Sputnik. Համացանցում կայծակնային տարածում ստացած Ղազախստանի նախագահ Նուրսուլթան Նազարբաևի լուսանկարը բնական է և ստացվել է պատահաբար, Sputnik Արմենիայի հետ զրույցում ասաց ՀՀ նախագահի լուսանկարիչ Դավիթ Հակոբյանը։
«Հիմնականում, նման հանդիպումների ժամանակ արարողակարգային լուսանկարներ ենք նկարում, ստեղծագործելու տեղ չկա։ Ուղղակի, սպասում էինք հերթական նիստը սկսվելուն, երբ ես նկատեցի, որ այդ սրահում հետաքրքիր լուսավորություն է։ Որոշեցի փորձել նախագահների մուտքի ժամանակ նկարել մեր նախագահին»,– պատմում է Դավիթ Հակոբյանը։
Բայց ՀՀ նախագահի փոխարեն լուսանկարի կենտրոնում պատահաբար հայտնվել է Ղազախստանի նախագահը։
«Հետո արդեն մյուս նախագահները ներս եկան, բայց արդեն լուսավորությունն այդ խորհրդավորությունը չուներ»,– ասում է Հակոբյանը` հավելելով, որ լույսից բացի, նկարին խորհրդավորություն են հաղորդում նաև նրա հայացքն ու կեցվածքը։
Հոկտեմբերի 12-ին Սոչիում կայացած ԱՊՀ երկրների ղեկավարների գագաթնաժողովի ժամանակ ՀՀ նախագահի անձնական լուսանկարիչ Դավիթ Հակոբյանի լուսանկարը մեծ տարածում է գտել հատկապես ղազախստանյան լրատվամիջոցներում։
