ՀՀ գյուղնախարար Իգնատի Առաքելյանը մսի թանկացման համար ոչ մեկին չի մեղադրում։ Նա գնային տատանումները համարում է շուկայի բնական արձագանք միջազգային ու ներքին ազդակներին։
«Ես խոսել եմ գյուղացիների հետ, գյուղացին այսօր կովի, ոչխարի գինը չի թանկացրել, չնայած կա կերի գնի թանկացում։ Չի թանկացրել, որովհետև իրացման և ֆինանսական հարցեր լուծելու խնդիր ունի»,– ասում է Իգնատի Առաքելյանը` դժվարանալով միանշանակ հերքել շուկայում տնտեսվարողների կողմից չարաշահումների հնարավորությունը։
«Երևանում մսի գնի թանկացումն ինձ համար անհասկանալի է, բայց չեմ կարող գնահատել, թե ինչու է թանկացել։ Այդ 100-150 դրամի թանկացումն այսօր իմ կարծիքով իրավիճակային է, որովհետև սկզբնական փուլում գյուղացիների կողմից ոչ մի թանկացում չի եղել», ասաց նա։
Առաքելյանի համոզմամբ, պետական համակարգն այս թանկացումների հարցում անելիք չունի։
