ԵՐԵՎԱՆ, 11 հոկտեմբերի — Sputnik. Հավաքական անվտանգության պայմանագրի կազմակերպության (ՀԱՊԿ) արագ արձագանքման համատեղ ուժերը (ՀՌԿԿ) Հայաստանի «Ալագյազ» զորավարժարանում «Փոխգործակցություն —2017» միջազգային մարտավարական զորավարժությունների մտահղացման համաձայն հետ մղեցին Հայաստանի վրա 1,5 հազար «հրոսակախմբի» հարձակումը։
Ինչպես նշեց ՀՌՕ զորահրամանատար գեներալ–գնդապետ Ալեքսանդր Դվորնիկովը, «Ալագյազ» և «Բաղրամյան» զորավարժարաններում անցկացվող «Փոխգործակցություն —2017» զորավարժությունները ՀԱՊԿ–ի «Մարտական եղբայրություն-2017» զորավարժությունների փուլերից մեկն է։
«Մենք ականատես դարձանք ՀԱՊԿ անդամ–պետության ինքնիշխանության պաշտպանության հարցում բոլոր ստորաբաժանումների սերտ գործակցությանը։ Պայքարն ընթանում էր լեռնային պայմաններում` ապօրինի զինված խմբավորումների դեմ»,– ասել է Դվորնիկովը։
Նրա խոսքով` ՀԱՊԿ երկրների ԶՈՒ–երն առանձին-առանձին պատրաստ են խնդիրների կատարմանը, իսկ ահա «Փոխգործակցությունը» նման զորավարժությունների վրա է մշակվում։
Դվորնիկովը նշել է, որ Հայաստանի զորավարժարաններում ևս երկու օր կընթանան զորավարժությունները։
ՀՀ ԶՈՒ գլխավոր շտաբի օպերատիվ վարչության պետ Տիրան Խաչատրյանն, իր հերթին, նշեց, որ զորավարժությունների ընթացքում դրված բոլոր խնդիրները լուծվել են։
«Դեռևս վերջնական արդյունք չկա։ Արդյունքները կամփոփվեն կրակային խոցումից հետո, սակայն մարտավարական խնդիրներն և գործողություններն, ընդհանուր առմամբ, կարելի է գնահատել լավ»,– ասել է Խաչատրյանը։
Զորավարժություններում պայմանական ապօրինի զինված խմբավորումների արգելափակման և ոչնչացման համար ներգրավվել էին ռուսական ռազմակայանի գումարտակի մարտավարական խումբը, Հայաստանի ՌՕՈՒ բանակային և գրոհային ավիացիայի, ռուսական ավիակայանի կործանիչները, ինչպես նաև համատեղ մանևրումների անդամ-պետությունների հատուկ ստորաբաժանումներ Հայաստանից, Բելառուսից, Ղազախստանից, Ղրղըզստանից, Ռուսաստանից և Տաջիկստանից։
«Փոխգործակցություն —2017-ն» անցկացվում է հավաքական անվտանգության պայմանագրի կազմակերպության (ՀԱՊԿ) արագ արձագանքման համատեղ ուժերի (ՀՌԿԿ) «Մարտական եղբայրություն —2017» գործառնական-ռազմավարական զորավարժության միասնական հայեցակարգի շրջանակներում:
