ԵՐԵՎԱՆ, 9 հոկտեմբերի — Sputnik. Բնապահպանության և ընդերքի տեսչությունը ճշտում է Մասիսում տարածված գարշահոտության պատճառը։
Տարածքի տարբեր վայրերից կատարված հեղուկի և օդի նմուշների լաբորատոր փորձաքննությունները դեռ չեն ավարտվել, բայց որոշ հետաքրքիր հանգամանքներ արդեն պարզվել են։
Պարզվել է, օրինակ, որ ամռանը սակավաջրության ու երաշտի պատճառով Մասիսի շրջակա հողատարածքների տերերն իրենց հողամասերը ոռոգել են կոյուղաջրով։
Այս մասին Sputnik Արմենիային հայտնեցին տեսչությունից՝ նշելով, որ այդ հանգամանքը բացահայտվել է տեսուչների կատարած այցի ժամանակ։
«Սակավաջրության պատճառով տեղի գյուղացիները կոտրել են կոյուղաջրերի հեռացման համակարգի խողովակը և դրանով իրականացրել գյուղատնտեսական դաշտերի ոռոգում, ինչը կրկնակի է ազդել մթնոլորտի աղտոտվածության վրա»,- հայտնում են տեսչությունից։
Եվ, այդուհանդերձ, կոյուղով ոռոգված դաշտերը տարածված գարշահոտության միակ պատճառը չեն։ Տեսչական մարմինը փորձում է պարզել նաև, թե տվյալ տարածքում գործող որ ձեռնարկությունների արտադրական թափոններում է գերազանցվում քիմիական թունավոր նյութերի թույլատրելի չափաքանակը, որոնք թափվում են կոյուղաջրերի հեռացման համակարգ և դառնում մթնոլորտի աղտոտվածության պատճառ:
Այդ նպատակով տեսուչները շարունակում են նմուշառումներ իրականացնել։
Միաժամանակ, միջոցներ են ձեռք առնվում կոյուղաջրերով իրականացվող ոռոգումը կանխարգելելու համար։
Մասիս քաղաքում առկա գարշահոտության մասին առաջին ահազանգերը համընկան Երևանում Նաիրիտ գործարանում բռնկված հրդեհի հետ, ինչն էլ պատճառ դարձավ, որ այն վերագրվի Նաիրիտից թունաքիմիկատների արտահոսքին։
Հարցի վերջնական պատասխանը կտա Բնապահպանական և ընդերքի տեսչության իրականացրած փորձաքննությունը։
