ԵՐԵՎԱՆ, 9 հոկտեմբերի — Sputnik. Հայաստանը մեծ նշանակություն է տալիս ՀԱՊԿ օպերատիվ արձագանքման հավաքական ուժերին, որոնք կարևորագույն գործիք են միջազգային հարաբերութուններում բախումնային իրավիճակները նվազեցնելու, ճգնաժամերը կարգավորելու համար, ՀԱՊԿ «Փոխգործակցություն-2017» զորավարժության մեկնարկի արարողության ժամանակ ասաց ՀՀ Զինված ուժերի պետ, գեներալ-լեյտենանտ Մովսես Հակոբյանը։
«Տարածաշրջանի ռազմաքաղաքական իրավիճակի վերլուծությունը ցույց է տալիս, որ քաղաքական, տնտեսական, էթնիկ հողի վրա հակամարտությունների առաջացումը շարունակում է շատ բարձր մնալ։ Դրանք հնարավոր չէ ժամանակին կարգավորել առանց ՀԱՊԿ օպերատիվ արձագանքման ուժերի»,- ասաց Հակոբյանը։
Նա նշեց, որ «Փոխգործակցություն-2017» զորավարժությունը համատեղ օպերատիվ և ռազմական պատրաստության գլխավոր միջոցառումն է։
Ըստ նրա` բոլոր երկրների ներկայությունը վկայում է մարտահրավերներին ու սպառնալիքներին համատեղ արձագանքելու ընդհանուր պատրաստվածության մասին։
ՀԱՊԿ «Փոխգործակցություն-2017» զորավարժությունը մեկնարկել է հոկտեմբերի 9-ին ՀՀ ՊՆ «Բաղրամյան» զորավարժարանում։
