Անի Լիպարիտյան, Sputnik Արմենիա.
Հայաստանի գրեթե բոլոր խանութներում մի քանի տեսակ հաց է վաճառվում։ Դրանց մեջ, անկասկած, նաև հայկական ավանդական լավաշ կա։ Իսկ, օրինակ, Արզնի համայնքում հացթուխները հաց են թխում ֆրանսիական հատուկ բաղադրատոմսով։
Հացթուխ Նելլի Քոսոյանի խոսքով` ֆրանսիական հացը նրա մոտ միշտ «հայկական շեշտադրում է» ունենում, որովհետև պատրաստվում է տեղական մթերքից։
«Ֆրանսիական հաց թխելու համար մենք օգտագործում ենք ալյուր, աղ, շաքարավազ, եթե պետք է` կաթնամթերք։ Իհարկե, մենք թխում ենք հատուկ բաղադրատոմսերով, որպեսզի հենց ֆրանսիական հաց ստանանք, բայց հայկական բաղադրիչներն իրենց գործն անում են»,- Sputnik Արմենայի թղթակցի հետ զրույցում ասաց նա։
Եվրոպա և Հայաստան
Նելլիի խոսքով` սպիտակ հացի արմատները տանում են դեպի Եվրոպա, իսկ հայկական հացի պատմությունը կապված է լավաշի հետ։
«Սկզբում մենք ունեցել ենք լավաշն ու բաղարջը։ Իսկ մյուս տեսակները` Մատնաքաշն ու Հրազդանը, շատ ավելի ուշ են հայտնվել` խորհրդային տարիներին»,- ասաց Նելլին։
Նա ընդգծեց նաև, որ այսօր մթերքի որակը շատ է փոխվել։
«Օրինակ` հացահատիկի այսօրվա տեսակներն ի հայտ են եկել ժամանակի ընթացքում։ Ալյուրն այսօր այն չէ, ինչպես, օրինակ, 100 տարի առաջ։ Ամեն ինչ փոխվել է»,- ասաց նա։
Նելլիի խոսքով` հաց թխելու ավանդույթը պայմանավորված է այն հանգամանքով, որ հայերը սիրել են հավաքվել ընտանիքով, այդ պատճառով էլ թոնրում հաց թխելը պարտադիր պայման է եղել։ Այդպես է ծնվել հաց թխելու ավանդույթը։
Նելլիի խոսքով` բացի լավաշից, մեր նախատատերը նաև փոքրիկ, գնդաձև հացեր են թխել ածուխի վրա։ «Համեստ» հացն ու պարզ բաղադրատոմսով ուտեստները վկայում են, որ մեր ժողովուրդը հնուց ի վեր սիրել է տնտեսել ու պատրաստել այն, ինչը հնարավոր է պահել մի քանի օր։
