ԵՐԵՎԱՆ, 7 հոկտեմբերի — Sputnik. Ռուս երգչուհի Նարգիզը Հայաստան է ժամանել, որպեսզի վաղը համերգային ծրագրով հանդես գա Կարեն Դեմիրճյանի անվան մարզահամերգային համալիրում: Երգչուհին հրաժարվեց շփվել լրագրողների հետ:
ԶԼՄ-ների ներկայացուցիչներն արտիստին դիմավորեցին «Զվարթնոց» օդանավակայանում:
«Հիանալի տրամադրություն ունեմ»,- միակ բանը, ինչ ասաց Նարգիզը:
Առաջիկա համերգի մասին հարցին պատասխանեց. «Ամեն ինչ հրաշալի է, սակայն այդ մասին եկեք հետո խոսենք»:
Ուզբեկական ծագմամբ հայտնի ամերիկացի երգչուհի Նարգիզ Զակիրովան այսօր աշխատում և ապրում է Մոսկվայում: Արտասովոր տեմբր ունեցող երգչուհին առաջին անգամ է ելույթ ունենալու Հայաստանում:
«Вдвоем», «Ты — моя нежность», «Нас бьют, а мы летаем» հիթերի կատարողը հոկտեմբերի 8-ին հանդես կգա Կարեն Դեմիրճյանի անվան մարզահամերգային համալիրում:
Նարգիզը ծնվել է 1970 թվականի հոկտեմբերի 6-ին Տաշքենդում՝ Ուզբեկստանում հայտնի երաժշտական ընտանիքում: 2013 թվականին անցավ ամերիկյան X-Factor նախագծի ընտրական երեք փուլերը, սակայն այն բանից հետո, երբ կազմակերպիչները նրան չզանգահարեցին, որոշեց մասնակցել ռուսական «Ձայնը» հեռուստանախագծին, որտեղ երկրորդ տեղը զբաղեցրեց: 2014 թվականի ապրիլից Նարգիզը համագործակցում է հայտնի ռուս պրոդյուսեր և կոմպոզիտոր Մաքսիմ Ֆադեևի հետ:
