ԵՐԵՎԱՆ, 7 հոկտեմբերի — Sputnik. Շաբաթ օրը Բաքվում ԵԱՀԿ ՄԽ համանախագահները քննարկեցին Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպման անցկացման հարցերը, հայտնում է ՌԻԱ Նովոստին:
ԵԱՀԿ ՄԽ համանախագահներ Ստեֆան Վիսկոնտիի, Իգոր Պոպովի, Էնդրյու Շոֆերի և ԵԱՀԿ գործող նախագահի հատուկ ներկայացուցիչ Անժեյ Կասպշիկի հետ հանդիպման ընթացքում քննարկվեց արցախյան հիմնախնդրի կարգավորման գործընթացի ներկա վիճակը:
Ադրբեջանի նախագահը հայտարարեց Արցախի շուրջ բանակցությունների վերսկսման և խնդրին վաղաժամկետ լուծում տալու երկրի շահագրգռվածության մասին:
Հայաստանի և Ադրբեջանի միջև Արցախի խնդրի շուրջ հակամարտությունը սկսվել է 1988 թ.-ի փետրվարին, երբ Լեռնային Ղարաբաղի ինքնավար մարզը հայտարարեց Ադրբեջանական ԽՍՀ կազմից դուրս գալու մասին։ 1991թ.-ի սեպտեմբերին ԼՂԻՄ կենտրոնում` Ստեփանակերտում, հայտարարվեց Լեռնային Ղարաբաղի Հանրապետություն ստեղծելու մասին։ Ադրբեջանը դրան հաջորդած ռազմական հակամարտության ընթացքում կորցրեց հսկողությունն Արցախի նկատմամբ։
