ԵՐԵՎԱՆ, 6 հոկտեմբերի — Sputnik. Եվրախորհրդի խորհրդարանական վեհաժողովի նախագահ Պեդրո Ագրամունտը հրաժարական է տվել: Այդ մասին նա գրել է Twitter-յան իր էջում:
«Այսօր ես որոշում եմ կայացրել այլևս չղեկավարել Եվրոպայի խորհրդի խորհրդարանական վեհաժողովը։ Պատճառներն անձնական են»,- գրել է նա:
Today, for personal reasons, I have decided to no longer chair the Parliamentary Assembly of the Council of Europe. pic.twitter.com/e17zwo2xsh
— Pedro Agramunt (@pagramunt) 6 октября 2017 г.
Արդեն հայտնի դարձավ նաև, որ ԵԽԽՎ-ն պաշտոնապես հաստատել է Պեդրո Ագրամունտի հրաժարականը։ Նախագահի պարտականությունները կկատարի ավագ փոխնախագահ բրիտանացի Ռոջեր Գեյլը, հաղորդում է ՌԻԱ Նովոստին` հղում անելով Վեհաժողովի հայտարարությանը։
Նրա հրաժարականը նախատեսված էր քննարկել հոկտեմբերի 9-ին կայանալիք Ստրասբուրգի լիագումար նիստում, սակայն քննարկումն այլևս չի կայանա։
ԵԽԽՎ կանոնների համաձայն՝ փոխնախագահ Ռոջեր Գեյլը կաշխատի մինչև Վեհաժողովի հաջորդ նիստի ժամանակ նոր նախագահ ընտրելը։
Հիշեցնենք, որ վերջերս գաղտնազերծված Ադրբեջանի իշխող վերնախավի ապօրինի գործողությունների մասին տվյալները որոշ բացահայտումներ արեցին նաև Եվրոպայի խորհրդի Խորհրդարանական վեհաժողովում (ԵԽԽՎ) տեղի ունեցող անօրինությունների մասին։
Մասնավորապես, խոսքը ԵԽԽՎ նախկին պաշտոնյաներին տված խոշոր կաշառքների մասին է։ Կաշառքների մասին հայտնի է դարձել Կոռուպցիայի ու կազմակերպված հանցագործությունների հետազոտման կենտրոնի (OCCRP), հեղինակավոր Guardian պարբերականի ու մի շարք այլ լրատվամիջոցների անցկացրած հետազոտության արդյունքում։
