ԵՐԵՎԱՆ, 6 հոկտեմբերի – Sputnik. Հայաստանում նոր ազգային ավիաընկերությունը կգործի, երբ հիմնավորվի դրա տնտեսապես շահավետ լինելը։ Այս մասին այսօր Երևանում լրագրողներին ասաց ՌԴ արդյունաբերության և առևտրի նախարար Դենիս Մանտուրովը` նշելով, որ այս թեման արդեն մեկ տարի քննարկվում է։
«Այժմ մենք գտնվում ենք գնահատումների վերջնական փուլում: Գնահատվում ենք Երևանից բոլոր հնարավոր արդյունավետ ուղղությունները, որպեսզի վերջնական որոշումներ ընդունվեն չվերթերի քանակի, ուղղությունների և շահագործման ժամկետների մասին՚,- ասաց Մանտուրովը:
Ռուսաստանցի նախարարը դժվարացավ ծրագրի հստակ ժամկետներ նշել, բայց հայտնեց` շուկայի ուսումնասիրությունները ցույց են տալիս, որ կան որոշ ուղղություններ, որոնք կարող են հեռանկարային լինել ստեղծվելիք փոխադրողի համար։
«Այդ ուղղություններից են Սոչին, Ստավրոպոլը, այնտեղ, որտեղ սփյուռք կա։ Դրանք կարող են լինել նաև միջազգային չվերթեր, օրինակ` դիտարկվում է Ֆրանսիայի ուղղությունը։ Երբ մենք հստակ տեսնենք, որ ինքնաթիռների ներմուծումը, ազգային փոխադրողի ստեղծումը տնտեսապես շահավետ է, մենք վերջնական որոշում կկայացնենք»,- ասաց Մանտուրովը։
Նրա խոսքով, ավիաընկերության ստեղծման գաղափարն առաջ է քաշել հայկական կողմը, Ռուսաստանն էլ ընդունել է առաջարկը։
Նոր ավիաընկերությունը շահագործվելու է բացառապես ռուսական արտադրության, մասնավորապես` «Սուխոյ Սուպեր Ջեթ» ինքնաթիռներով (SSJ-100)։
SSJ-100 առաջին ինքնաթիռը հայկական «Արմավիա» ընկերությունը ձեռք էր բերել 2011 թվականին։ Մեկ տարի անց նախատեսված էր նաև երկրորդ նմանատիպ ինքնաթիռի գնումը։ Սակայն «Արմավիան» ստիպված եղավ հրաժարվել գործարքից` ֆինանսական խնդիրների պատճառով։ Իսկ 2012 թվականի օգոստոսին ընկերությունը Ռուսաստանի վերադարձրեց նաև առաջին ինքնաթիռը:
