ԵՐԵՎԱՆ, 4 հոկտեմբերի — Sputnik. Չեխիայի Խորհրդարանի Սենատի նախագահ Միլան Շտեխը վստահեցնում է, որ Չեխիայի կառավարությունն Ադրբեջանին զենք չի վաճառել: ՀՀ Ազգային ժողովում լրագրողների հետ ճեպազրույցի ժամանակ Չեխիայի Սենատի նախագահն անդրադարձավ տարածված լուրերին, թե Չեխիան Ադրբեջանին զենք է վաճառել:
«Վստահեցնում եմ, որ Չեխիայի կառավարությունն Ադրբեջանին զենք չի վաճառել: Չեխիան հարգում է զենքի վաճառքի այն էմբարգոն, որը դրված է հակամարտության մեջ գտնվող երկրներին զենք վաճառելու վրա»,- ասաց նա։
Նրա խոսքով` իրենք չգիտեն, թե ինչպես է չեխական զենքը հայտնվել Ադրբեջանում, սակայն վստահեցրեց, որ Չեխիայի կառավարությունը դրան համաձայնություն չի տվել:
Ղարաբաղյան հակամարտության թեմային անդրադառնալով` նա նշեց, որ միակ լուծումը կարող է կայանալ ԵԱՀԿ Մինսկի խմբի ձևաչափում։
Նա նշեց, որ գերտերությունները` Ռուսաստանը, ԱՄՆ-ն ու Ֆրանսիան, կկարողանան խաղաղ ու արդար լուծում գտնել։
Նշենք, որ սեպտեմբերի 18-ին Ադրբեջանում անցկացվող զորավարժության շրջանակում ցուցադրվել էր չեխական արտադրության «Դանա» ինքնագնաց հրետանի և RM-70 ՀԿՌՀ։ Փորձագետները կարծում են, որ նշված տեխնիկան Ադրբեջանն ամենայն հավանականությամբ ձեռք է բերել Իսրայելի միջնորդությամբ:
