Բնապահպան Կարինե Դանիելյանը կասկածներ ունի, որ Սևանից բաց թողնվող ջրի քանակն ավելացվել է ոչ թե ոռոգման, այլ մեծահարուստների առանձնատներն ու հյուրանոցները փրկելու համար։
«Սևանի ջրի մակարդակն, իրոք հասել է օլիգարխների, տարբեր բարձրաստիճան պաշտոնյաների պատկանող կառույցներին, և այլևս Սևանին թույլ չեն տա բարձրանալ»,– ասում է բնապահպանը։
Սևանի մասին օրենքով ռազմավարական 6 մետր բարձրացման նիշը, Կարինե Դանիելյանի խոսքով, այն անհրաժեշտ շեմն է, որը թույլ կտա Սևանա լճին ինքնամաքրվել։
Մինչդեռ տարեկան ջրառի ծավալը օրենքով 100 մլն խմ–ով ավելացնելու նախաձեռնությունը, բնապահպանի համոզմամբ, լուրջ հարված է Սևանին։
«Հիմա մենք ունենք անցյալ տարվա նույն ժամանակահատվածի համեմատ —3 նվազում, բայց, իհարկե, դեռ վաղ է գնահատական տալ, որպես կանոն համեմատում են հունվարի 1-ի կամ դեկտեմբերի 31-ի տվյալները»,– ասում է Կարինե Դանիելյանը։
Կառավարության վերաբերմունքը Սևանա լճին նա համեմատում է ջրամբարի նկատմամբ վերաբերմունքի հետ, որտեղից ըստ անհրաժեշտության ցանկացած պահի կարելի է ցանկացած ծավալով ջուր վերցնել։
Նման անհեռատես վերաբերմունքը, Կարինե Դանիելյանի կարծիքով, կարող է նաև տարածաշրջանում երկրաշարժի պատճառ դառնալ։
Հիշեցնենք, ՀՀ ԱԺ–ն այս տարի կառավարության առաջարկով փոփոխություն իրականացրեց Սևանի մասին օրենքում` բաց է թողնվող ջրի ծավալն ավելացնելով 100 մլն խորանարդ մետրով` տարեկան բացթողնման առավելագույն թույլատրելի ծավալը 170-ից հասցնելով 270 մլն խմ։
