ԵՐԵՎԱՆ, 4 հոկտեմբերի — Sputnik. «Դոպելմայեր Սեյլբահենեն» ավստրիական ընկերությունը հետաքրքրված է Երևանում ճոպանուղի կառուցելու հարցով։ Ճոպանուղու երթերի ճիշտ ուղղության ընտրությունը դեպի ճոպանուղի կներգրավի զբոսաշրջային հոսքեր, կարծում է ընկերության ծրագրերի ղեկավար Վալերի Յաշինը։ Նա ճոպանուղի կառուցելու շուրջ քննարկումներ է ունեցել Երևանի փոխքաղաքապետ Վահե Նիկոյանի հետ։
Հաշվի առնելով Երևանի տեղանքը և ճանապարհային խցանումները, նոր ճոպանուղու կառուցումը, մասնագետների հավաստմամբ, կարող է որոշակի արդյունավետ լուծումներ ապահովել ինչպես տրանսպորտային փոխադրումերի, այնպես էլ խիտ երթևեկության բեռնաթափման գործում:
Երևանի քաղաքապետի տեղակալ Վահե Նիկոյանի կարծիքով, նոր ճոպանուղին լուծում կարող է լինել մայրաքաղաքի օրեցօր մեծացող տրանսպորտային հոսքերի բեռնաթափման առումով:
«Նոր ճոպանուղու կառուցման ծրագիրը մենք դիտարկում ենք որպես մասնավոր ներդրումների ներգրավմամբ իրականացվելիք ծրագիր, ինչը, համոզված ենք, մայրաքաղաքում վերականգնելով տրանսպորտային այս տեսակի շահագործումը, իր հերթին կարևոր նշանակություն կունենա միանգամից մի քանի ոլորտների համար», — նշել է Վահե Նիկոյանը:
Նա վստահեցրել է, որ հայկական կողմը բաց է և պատրաստակամ համակողմանիորեն քննարկելու երկուստեք փոխշահավետ համագործակցության բոլոր հնարավորությունները։
Առաջիկայում համատեղ աշխատանքային խումբ կձևավորվի, որը կուսումնասիրի մայրաքաղաքի ենթակառուցվածքները, ծրագրի իրագործման հնարավորությունները և տարբերակները:
1883թ. հիմնադրված «Դոպելմայեր Սեյլբահենեն» ընկերությունն աշխարհի ավելի քան 2700 քաղաքում կառուցել է 14600 ճոպանուղի:
