Ջավախքում սեպտեմբերի 30-ին գրանցված բախումներից հետո իրավիճակը հանդարտ է։ Այս պահին հանրությունը սպասում է հոգևորականների երկխոսությանը, որի ընթացքում պետք է որոշում կայացվի գյուղի եկեղեցու մոտ խաչքար տեղադրել–չտեղադրելու մասին։
Այդ մասին Sputnik Արմենիայի հետ զրույցում ասաց ՀՀ ԱԺ պատգամավոր, ծագումով ջավախեցի Շիրակ Թորոսյանը՝ անդրադառնալով ջավախահայերի և վրացի ոստիկանների միջև տեղի ունեցած բախումներին։
Միաժամանակ, Շիրակ Թորոսյանը չի բացառում, որ հրահրված բախումները սադրանքի հետևանք են` կապված հոկտեմբերի 21-ին նախանշված ՏԻՄ ընտրությունների հետ։
«Իհարկե նախադրյալներ կային, բայց պատահական չէ, որ սրբվեց հենց ընտրությունների նախօրեին»,– ասաց Թորոսյանը։
Սեպտեմբերի 30-ի առավոտյան, Ջավախքի Գումբուրդո գյուղի հայազգի բնակիչները փորձել էին խաչքար տեղադրել 10-րդ դարի եկեղեցու բակում, բայց իշխանությունները թույլ չէին տվել, ինչի արդյունքում բախում էր տեղի ունեցել ոստիկանների և գյուղացիների միջև: Գյուղ էր բերվել Վրաստանի ոստիկանության հատուկ նշանակության գումարտակը, դեպքի վայր էր ժամանել Վրաստանի ներքին գործերի նախարար Գեորգի Մգեբրիշվիլին։
