Բնապահպանության նախարար Արծվիկ Մինասյանն ու բնապահպանության և ընդերքի տեսչության պետ Եղիշ Տերտերյանը նորմալ, աշխատանքային հարաբերությունների մեջ են, Sputnik Արմենիայի հետ զրույցում ասաց նախարարի խորհրդական Արծրուն Պեպանյանը` հերքելով մամուլում տեղ գտած հակառակ պնդումները։
«Նախարարն ու տեսչության պետը վերջին անգամ հանդիպել են երեկ, և հարաբերություններում որևէ լարվածության նշույլ չի եղել»,– ասում է Պեպանյանն ու հավելում, որ տեսչության պետի հետ հանդիպել և զրուցել է նաև առանձին, բայց դարձյալ որևէ լարվածություն չի նկատել։ «Մենք շփվել ենք նախանձելի ջերմ»,–վստահեցրեց նախարարի խորհրդականը։
Ինչ վերաբերում է տեղեկություններին, թե նախարարը դժգոհ է օգոստոսին ձևավորված նոր տեսչական մարմնում կատարված կադրային նշանակումներից և չի կարողանում պայքարել իր ենթակայության տակ գտնվող տեսչական մարմնի ղեկավարի դեմ, Արծրուն Պեպանյանը նշեց, որ այդ կարգի պնդումները անտեղյակության արդյունք են։
«Նորաստեղծ տեսչական մարմինը չի ենթարկվում բնապահպանության նախարարին, և նախարարը իրավիճակ վերահսկելու լիազորություն չունի։ Տեսչական մարմինը ղեկավարում է վարչապետի հաստատած խորհուրդը, որի կազմում նախարարությունն ունի ընդամենը մեկ ձայն»,– ասաց Պեպանյանը։
Նախարարի խորհրդականը վստահեցնում է`Արծվիկ Մինասյանն ու Եղիշ Տերտերյանը միասին աշխատում են հանուն առողջ համակարգի ստեղծման, որն ի զորու կլինի լուծել կուտակված խնդիրները։
