ԵՐԵՎԱՆ, 3 հոկտեմբերի — Sputnik. ՀԱՊԿ անդամ-երկրների պատգամավորները հանդիպել են Ռոստովում «Մարտական եղբայրություն 2017» համատեղ զորավարժությունների մեկնարկից մեկ օր առաջ։
Արտագնա նիստին մասնակցել են Ռուսաստանի, Հայաստանի, Բելառուսի, Ղազախստանի և Տաջիկստանի խորհրդարանների պաշտպանության և անվտանգության կոմիտեների և հանձնաժողովների նախագահները։ Խորհրդարանականները քննարկել են Կովկասում տիրող ռազմաքաղաքական իրավիճակը։ ՀԱՊԿ բոլոր անդամ-պետությունները պատասխանատվություն են կրում այդ տարածաշրջանում խաղաղության պահպանման համար։
Նիստի մասնակիցների առջև ելույթ է ունեցել Հարավային ռազմական օկրուգի զորքերի հրամանատար, Ռուսաստանի հերոս, գեներալ-գնդապետ Ալեքսանդր Դվորնիկովը։ Նա խոսել է «Մարտական եղբայրություն 2017» համատեղ զորավարժությունների մտահղացման և խնդիրների մասին։
Զորավարժություններն անցկացվելու են երեք փուլով ՌԴ-ի, Հայաստանի, Ղազախստանի և Տաջիկստանի տարածքներում։ Զորավարժություններին, զինվորականներից բացի, մասնակցելու են օպերատիվ խմբեր և հատուկ նշանակության զորքեր (մոտ 12 հազար մարդ)։
ՀԱՊԿ-ի զորավարժություններն առաջին անգամ անցկացվելու են ընդհանուր սցենարով։ Կազմակերպության մասնակից երկրների համատեղ ուժերը հետախուզում են անցկացնելու, այնուհետև պայմանական հակառակորդի դեմ ռազմական գործողություններ են իրականացնելու, որից հետո միանալու են նաև խաղաղապահները։
Հանդիպման արդյունքները Sputnik-ի համար մեկնաբանել է ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Կորյուն Նահապետյանը։
«Մեր հանդիպումը ճանաչողական բնույթ էր կրում և անցավ բարձր մակարդակով։ Մենք եկանք այն ընդհանուր եզրակացության, որ կշարունակենք քննարկումներն ու ընդհանուր պատասխանատվության գոտում ռազմաքաղաքական իրավիճակի նկատմամբ մոնիտորինգի իրականացումը։ Զորավարժությունների արդյունքում ևս մեկ հանդիպում ենք անցկացնելու», — ասաց Նահապետյանը։
Ռոստովի մարզի զորավարժարաններից մեկում հոկտեմբերի 3-ին մեկնարկեց «Մարտական եղբայրություն 2017» զորավարժությունների առաջին փուլը։ Զորավարժություններին ներգրավված է շուրջ հազար զինծառայող, այդ թվում` 180 մարդ Հայաստանից։
Առաջին փուլից հետո զորավարժությունները կտեղափոխվեն Հայաստան` «Բաղրամյան» զորավարժարան։
