ԵՐԵՎԱՆ, 1 հոկտեմբերի — Sputnik. Վրաստանի նախկին նախագահ և Օդեսայի շրջանի նախկին նահանգապետ Միխեիլ Սաակաշվիլին մտադիր է Կիևում փոխել իշխանությունը, ինչի մասին հայտարարել է երեկ Օդեսայում տեղի ունեցած հանրահավաքի ժամանակ, հայտնում է ՌԻԱ Նովոստին` հղումանելով ուկրաինական УНИАН լրատվական գործակալությանը:
Սահակաշվիլին պարզաբանել է, որ նման որոշում է կայացրել, քանի որ Կիևի իշխանությունները խանգարել են իրեն փոփոխություններ կատարել Օդեսայում:
«Չհաջողվեց դա անել, քանի որ անդադար խանգարում էին: Առաջին հերթին՝ Կիևից», — ասել է նա` ավելացնելով, որ հենց դա է ստիպում իրեն պայքարել Ուկրաինայում կենտրոնական իշխանության մարմիններին արմատապես փոխելու համար:
Միևնույն ժամանակ նա պատրաստ է վերադառնալ Օդեսա` սկսած գործը շարունակելու համար:
«Ինձ այդ քաղաքում ամեն ինչ դուր է գալիս, բացի մի կույտ ավազակներից, որոնք ամեն ինչ փչացրեցին: Մենք անպայման նրանց մի կողմ կքշենք», — խոստացել է Սահակաշվիլին` կոչ անելով իր կողմնակիցներին Կիևում հոկտեմբերի 17-ին դուրս գալ հանրահավաքի` Ուկրաինայի նախագահ Պյոտր Պորոշենկոյին իմպիչմենթ հայտարարելու պահանջով:
Ընդ որում,Սահակաշվիլու ժամանումը քաղաքում նրա կողմնակիցների և հակառակորդների միջև բախման պատճառ է դարձել: Սակայն ոստիկանությունը շատ արագ կարողացել է ցրել այն:
Հիշեցնենք, որ Միխեիլ Սահակաշվիլին, որին զրկել էին Ուկրաինայի քաղաքացիությունից, իր կողմնակիցների աջակցությամբ, որոնք սեպտեմբերի 10-ին «Շեգինի» անցակետում ճեղքել էին ուժայինների շղթան, անցել էր Ուկրաինայի տարածք։
Երկրի պետական սահմանապահ ծառայությունը հայտարարել էր, որ նա սահմանն անօրինական ճանապարհով է անցել, քանի որ Սահակաշվիլին սահմանային ստուգում չի անցել: Ոստիկանությունը նախկին նահանգապետի նկատմամբ քրեական գործ է հարուցել երկու` «պետական սահմանի անօրինական հատում և մարդկանց տեղափոխում» և «իրավապահ մարմիններին չենթարկվելու» հոդվածներով:
