ԵՐԵՎԱՆ, 1 հոկտեմբերի – Sputnik. Թուրքիայի նախագահ Ռեջեփ Թայիփ Էրդողանը համոզված է, որ Անկարան ոչինչ չի կորցնի, եթե չանդամակցի ԵՄ–ին, փոխանցում է ՌԻԱ Նովոստին:
«ԵՄ-ի նոր ծրագրերի իրականացման միակ ճանապարհն անցնում է Թուրքիայի լիիրավ անդամ դառնալու միջով: Թուրքիան պատրաստ է աջակցել նման նախաձեռնություններին և իր ներդրումն ունենալ Եվրոպայի ապագա զարգացման մեջ: Սակայն, եթե ԵՄ-ն այլ ճանապարհ ընտրի, խնդիր չէ: Թուրքիան ոչինչ չի կորցնի և կշարունակի իր ճանապարհով գնալ», — հայտարարել է Էրդողանը` ելույթ ունենալով Թուրքիայի խորհրդարանի աշնանային նստաշրջանի բացմանը:
Նա նշել է, որ Թուրքիան այլևս ԵՄ-ին անդամակցելու կարիք չունի, սակայն ամեն դեպքում չի դադարեցնի բանակցել այդ հարցի շուրջ։ Էրդողանի խոսքով` ԵՄ-ի քաղաքականությունը կապված է Թուրքիայի հետ, սակայն այն չի աջակցում Անկարային ահաբեկչության դեմ պայքարում:
«ԵՄ երկրները այն պետությունների շարքում են, որոնց աջակցության մեջ մենք ամենից շատ ենք հիասթափվել: Թուրքիան շատ է մտահոգված ահաբեկչության նկատմամբ նրանց թողտվությամբ, ովքեր բաց կերպով հանդես են գալիս ԵՄ-ին Թուրքիայի անդամակցման դեմ», — ասել է Էրդողանը:
Թուրքիայի նախագահն ավելացրել է, որ Եվրոպայում ահաբեկիչները բավականին ազատ են գործում` անխոչընդոտ իրականացնելով Թուրքիայի իշխանությունների դեմ ուղղված իրենց ծրագրերը:
ԵՄ-ի ու Թուրքիայի հարաբերությունները սրվել են երկրում զինված հեղաշրջման փորձից հետո։ Այն ժամանակ ԵՄ-ն հանդես եկավ Թուրքիայի իշխանությունների հասցեին խիստ քննադատությամբ` զանգվածային ձերբակալությունների և այլ խիստ միջոցների համար ու կասեցրեց Թուրքիայի` Եվրամիություն մտնելու շուրջ բանակցությունները։
