ԵՐԵՎԱՆ, 1 հոկտեմբերի — Sputnik, Արմենուհի Մխոյան. Գյումրեցիներին շնորհավորելու էր եկել անձամբ ՀՀ նախագահը: Նախագահին աղ ու հացով, գյումրեցու ավանդական գաթայով դիմավորեցին, ջուրն էլ՝ գյումրեցիների հայտնի կլկլանով հյուրասիրեցին, հետն էլ «բուռըմ ցորեն նվիրեցին, որ ճամփեն ղսմթով էղնի, երկրի գործերն էլ՝աջ»։
ՀՀ նախագահ Սերժ Սարգսյանի ներկայությամբ շահագործման հանձնվեց Գյումրու մանկապատանեկան արվեստի պալատը՝ նախկին Պիոներ պալատը: Նախագահը ծանոթացավ Գյումրու Ռուսթավելի փողոցում իրականացված աշխատանքներին, իսկ ավելի ուշ՝ «Գյումրու օրը» տոնկատարության շրջանակում, Գյումրու կենտրոնական հրապարակում տեղի ունեցավ նաև ռետրո մեքենաների ցուցադրությունն ու փողային նվագախմբի ելույթը:
«Իմ հին ու նոր Գյումրին» կարգախոսի ներքո «Գյումրու օր» տոնակատարությունների շրջանակներում քաղաքում տեղի ունեցավ Մանկապատանեկան արվեստի պալատի շենքի բացման արարողությունը, «Երեխաներ և գույներ» մանկական միջոցառումը, նաև` Շիրազի «Հուշարձան հայրիկիս» գրքի նոր` ամբողջական հրատարակության շնորհանդեսը:
Գյումրեցիների ամենասիրելի ճեմուղիներից մեկի՝ նախկին Ալեքսանդրովսկի, այժմ Քըրք Քըրքորյանի փողոցում արդեն ավանդական դարձած «Արհեստների փառատոնն» էր, իսկ Հացի փառատոնն անցկացվեց Քաղաքային կենցաղի ու ժողովրդական ճարտարապետության թանգարանի բակում:
Օրն ավարտվում է կենտրոնական հրապարակում՝ տոնական համերգով և հրավառությամբ:
Գյումրեցիներից հետաքրքրվեցի՝ քաղաքը քանի՞ տարեկան է: Նրանք չկարողացան ստույգ ասել, բայց հումորով պատասխանեցին՝ «Երևանը, որ ծնվավ Գյումրին կոնյակ բոնբոներկայով աչքալուսանքի գնաց»:
