ԵՐԵՎԱՆ, 30 սեպտեմբերի — Sputnik. Հայաստանի հավաքականը չի կարող մասնակցել 2017 թվականի Աշխարհի առաջնությանը։ Այս մասին հայտնում է IWF-ի պաշտոնական կայքը։
Ծանրամարտի միջազգային ֆեդերացիան (IWF) դոպինգային խախտումների համար մեկ տարով հեռացրել է ինը երկրի՝ Ռուսաստանի, Ղազախստանի, Չինաստանի, Բելառուսի, Ադրբեջանի, Հայաստանի, Թուրքիայի, Ուկրաինայի ու Մոլդովայի ծանրամարտի ֆեդերացիաներին ։ Որոշումը, որն ուժի մեջ կմտնի հոկտեմբերի կեսին, կայացրել է IWF-ի գործադիր կոմիտեն։
«Կոմիտեն այսօր որոշում է կայացրել, որ այն ազգային ֆեդերացիաները, որոնց մոտ 2008 և 2012 թվականների ստուգումից հետո բացահայտվել է հակապոդինգային կանոնների առնվազն երեք խախտում, պետք է մեկ տարով հեռացվեն։ Տվյալ պահին դրանք Հայաստանի, Ադրբեջանի, Բելառուսի Չինաստանի, Մոլդովայի, Ղազախստանի, Ռուսաստանի, Թուրքիայի ու Ուկրաինայի ֆեդերացիաներն են», — նշված է հաղորդագրության մեջ։
«Մենք հստակ հասկացրինք, որ որոշ տարածաշրջաններում դոպինգի օգտագործման դեպքերի քանակն անթույլատրելի է, մեր կազմակերպության անդամները պարտավոր են իրենց երկրներում պահպանել սպորտի մաքրությունը։ Եթե նրանք չեն կատարում իրենց պարտավորությունները, ապա կորցնում են միջազգային մրցումներին մասնակցելու իրավունքը», — ասել է IWF նախագահ Տամաշ Այանը։
Նա հավելել է, որ IWF-ը երես չի թեքի այդ ֆեդերացիաներից։
«Մենք կշարունակենք աշխատել նրանց, Համաշխարհային հակադոպինգային գործակալության ու ազգային հակադոպինգային գործակալությունների հետ, որպեսզի սատարենք դոպինգի դեմ պայքարը», — հավելել է նա։
Ծանրամարտի աշխարհի առաջնությունը կկայանա 2017 թվականի նոյեմբերի վերջին, դեկտեմբերի սկզբին ԱՄՆ-ի Անահայմ քաղաքում։
