ԵՐԵՎԱՆ, 30 սեպտեմբերի — Sputnik. Ցույց տվեք ինձ սահմանային անցակետ ադրբեջանա-ղարաբաղյան սահմանին, և խոստանում եմ հաջորդ անգամ Արցախ գնալ այդ ճանապարհով։ Այսօր Sputnik Արմենիա մամուլի կենտրոնում հանդիպմանը նման հայտարարություն արեց քաղաքական, հասարակական գործիչ Արագած Ախոյանը` անդրադառնալով իր հրավերով Արցախ այցելած թուրք գործիչների նկատմամբ սահմանախախտման մեղադրանքով Ադրբեջանում հարուցված քրեական գործին։
Սեպտեմբերի 22-24-ը Արցախ այցելած 4 թուրք գործչի նկատմամբ սեպտեմբերի 28-ին Ադրբեջանը քրեական գործ է հարուցել, կալանավորման որոշում կայացրել, հայտարարել հետախուզում, ներառել հայտնի «սև ցուցակում» և դիմել Թուրքիայի համապատասխան մարմիններին` նրանց ձերբակալելու պահանջով։
Ի դեպ, Արցախ մեկնելուց առաջ էլ, Արագած Ախոյանի խոսքով, թուրք գործիչներն արդեն տեղյակ են եղել Ադրբեջանում «սև ցուցակի» առկայությանն ու Արցախ այցելողների նկատմամբ քրեական հետապնդման պրակտիկային։ Բայց դա նրանց որոշման վրա չի ազդել։
«Մեր ընկերները քաջ գիտակցելով են դա արել` որպես խաղաղության դեսպաններ։ Եվ երբ ադրբեջանական լրատվամիջոցին տված հարցազրույցում Ուֆուք Ուրասին հարցնում են` դուք տեսա՞ք այդ տարածքը` որպես ադրբեջանական տարածք, ասում է` ոչ։ Իսկ երբ ասել էին` դուք գիտե՞ք, որ հայտնվել եք «սև ցուցակում», ասել էր` այո, և ի՞նչ»,- ասաց Ախոյանը` նշելով, որ թուրք գործիչները չեն պատրաստվում բողոքարկել իրենց նկատմամբ կայացված որոշումները։
Հայ գործչի համոզմամբ, հայ-թուրքական հարաբերությունների նման դրսևորումները շատ բան կարող են փոխել թուրքական մերժողականության ճակատում։
Թուրք գործիչներին Արցախ հրավիրողներից մեկն էլ ազգագրագետ Հարություն Մարությանն է, որը համոզված է` նման շփումները խաղաղության հաստատման գործընթացի սկիզբն են։
«Ինչու չէ` գնալ, հանդիպել արցախյան իշխանությունների, ժողովրդի հետ և այդ տեղեկատվությունը բերել հասցնել թուրք հասարակությանը։ Մի բան է, երբ ինֆորմացիան գալիս է միջնորդավորված` ադրբեջանական գործակալություններ միջոցով, մի բան է, երբ մարդիկ ` լրագրող, քաղաքական գործիչ, իրենք են տեսնում և հետո արդեն ներկայացնում այն ճշմարտությունը»,- ասաց Մարությանը։
Հիշեցնենք` «Վերադարձ» հիմնադրամի և Արագած Ախոյանի հրավերով սեպտեմբերի 22-24-ը Արցախ էին այցելել հայտնի թուրք հասարակական-քաղաքական գործիչներ, գրողներ, լրագրողներ Ուֆուք Ուրասը, Ալի Բայրամօղլուն, Սաիթ Չեթինօղլուն և Էրոլ Քաթըրջըօղլուն։
Թուրք գործիչներն Արցախում հանդիպել ու զրուցել են բնակչության, իշխանության ներկայացուցիչների հետ։
