ԵՐԵՎԱՆ, 29 սեպտեմբերի — Sputnik. ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը հույս է հայտնել, որ Սիրիայում խաղաղության հաստատման հետ մեկտեղ կվերականգնվի նաև Դեր Զորի հայկական եկեղեցին, հայտնում է ՌԻԱ Նովոստին։
Դեր Զորում գտնվող Սուրբ նահատակների հայկական եկեղեցին ահաբեկիչների կողմից քաղաքի վրա հարձակվելու ժամանակ առաջիններից էր, որ պայթեցրին։
«Դեր Զորում Հայոց ցեղասպանության նահատակներին նվիրված հայկական եկեղեցի կար։ Այդ եկեղեցին առաջինը պայթեցվեց, երբ Դեր Զորը գրավեցին իսլամիստները։ Այդ պատճառով Դեր Զորի ազատագրումը մեզ համար բարոյահոգեբանական նշանակություն ունի։ Ես հույս ունեմ, որ այդ համալիրը կվերականգնվի և Սիրիայում վերջնական խաղաղություն կհաստատվի», – ասել է Աշոտյանը Դաշնային խորհրդի միջազգային գործերով կոմիտեի հետ համատեղ նիստի ժամանակ։
Նա բարձր է գնահատել Սիրիային ուղղված Ռուսաստանի աջակցությունը, քանի որ Դամասկոսը Հայաստանի մոտ հարևաններից է, բացի այդ այնտեղ մեծ հայկական համայնք կա։ Ռազմական գործողություններից հետո 20 հազար փախստական ապաստան է գտել Հայաստանում։
