ԵՐԵՎԱՆ, 29 սեպտեմբերի — Sputnik. Օրգանական և դեղագործական քիմիայի գիտատեխնոլոգիական կենտրոնում բռնկած հրդեհը մեկուսացվել է, լրագրողներին ասել է ԱԻՆ Երևան քաղաքի փրկարարական վարչության պետ Ներսիկ Նազարյանը:
Սեպտեմբերի 10-ին, ժամը 10:01-ին ԱԻՆ-ն ահազանգ է ստացել, որ Ազատության 26 հասցեում, որտեղ գտնվում է Հայաստանի ԳԱԱ Օրգանական և դեղագործական քիմիայի գիտատեխնոլոգիական կենտրոնը, ծուխ է նկատվել։ Դեպքի վայր են մեկնել վեց մարտական հաշվարկ ու ԱԻՆ Ճգնաժամային կառավարման ազգային կենտրոնի արագ արձագանքման խումբը։
«Մեր քիմիկոսներն աշխատում են և կասեն, թե օդի աղտոտվածության աստիճանն ինչպիսին է, բայց անզեն աչքով էլ երևում է, որ վտանգ չկա: Շատ արագ հրդեհաշիջում կատարվեց, հրդեհի տարածման վտանգ չկա, այն ամբողջությամբ մեկուսացված է», — ասել է Նազարյանը։
Նրա խոսքով` մոտակայքում բնակելի շենքեր չկան, իսկ բուն շենքը շատ չի տուժել։ ԱԻՆ-ի ներկայացուցիչը նշել է, որ շենքից 50 մետր հեռավորության վրա կոնցենտրացիա չկա, բնակչությանը տարհանման կարիք` ևս։
ԱԻՆ-ը հայտնում է, որ լաբորատորիայի պահեստում (նկուղային հարկ՝ 28 քմ) այրվել են քիմիական նյութեր։
