ԵՐԵՎԱՆ, 29 սեպտեմբերի — Sputnik. Երևանի հիմնադրման 2799 –ամյակին նվիրված «Էրեբունի– Երևանի» միջոցառումներն այս տարի կանցկացվեն «Երևան՝ սիրո քաղաք» կարգախոսով։
Հոկտեմբերի 14-ին Երևանի տարբեր հատվածներում տեղակայված բեմահարթակներում կկազմակերպվեն ռոք, ջազ, դասական, ազգային երաժշտության համերգներ։
Իսկ «Հանրապետության հրապարակ» մետրոյի կայարանի հարակից Խաչքարերի պուրակում կկազմակերպվի «Հին ու նոր Երևանս» խորագրով ցուցահանդեսը, «Ես ու Երևանս» մանկապատանեկան տոնական համերգը, Կարապի լճի հարակից տարածքում կտեղակայվեն լուսանկարչական տաղավարներ, Սարյանի անվան պուրակում նկարիչների ձեռքով կստեղծվի «Մեկ կտավ Երևանիս» աշխատանքը, որը կնվիրաբերվի Երևան քաղաքի պատմության թանգարանին:
Հոկտեմբերի 28-ին Երևանի քաղաքապետարանը «Էրեբունի– Երևանի» միջոցառումների շարքը կսահմանափակի սահմանամերձ գոտիներում ծառայող երևանաբնակ զինծառայողների ծնողների` իրենց զավակներին հերթական այցով:
Տոնական բոլոր միջոցառումների կազմակերպման համար այս տարի քաղաքային բյուջեից կծախսվի 60 մլն դրամ։ Այս գումարի մեջ ընդգրկված են նաև
սոցիալական և հասարակական տարբեր խմբերի ընտանիքների համար նախատեսված աջակցության ծրագրեր։
Բայց այս գումարը, Երևանի քաղաքապետի տեղակալ Արամ Սուքիասյանի խոսքով, չէր բավարարի բոլոր ծրագրերի իրականացման համար, եթե չլինեին հովանավորները։ Իսկ նրանց տրամադրած գումարի չափը քաղաքապետարանը չի հրապարակում։
Եթե այս տարի քաղաքապետարանը բավարարվում է համեստ ծախսերով, ապա հաջորդ տարի մայրաքաղաքի հոբելյանական տարեդարձն անհամեմատ ավելի ճոխ կլինի։
«2800 ամյակը կնշվի շատ ավելի ճոխ: Արդեն ձևավորված է հանձնաժողով, աշխատում ենք այդ ուղղությամբ: Ամբողջ տարին լինելու է հոբելյանական, հայ ժողովրդի համար խիստ բրենդային նշանակություն ունեցող տարի է»,- ասաց Սուքիասյանը։
Երևանի հիմնադրման 2018թ–ի միջոցառումները նախապատրաստելու համար նախագահ Սերժ Սարգսյանի հրամանով արդեն հոբելյանական հանձնաժողով է կազմվել։
Այն կգլխավորի ՀՀ վարչապետ Կարեն Կարապետյանը, նրա տեղակալներն են Երևանի քաղաքապետ Տարոն Մարգարյանը, Ազգային ժողովի նախագահի տեղակալ Էդուարդ Շարմազանովը։ Հանձնաժողովի աշխատանքներին անդամի կարգավիճակով կմասնակցեն գործադիր իշխանության գրեթե բոլոր պետական մարմինների ղեկավարները։
