ԵՐԵՎԱՆ, 28 Սեպտեմբեր — Sputnik, Անի Լիպարիտյան. Եկատերինբուրգից Հայաստան ժամանած բլոգեր Աննա Ձյուբան իր եռօրյա ուղևորությունը հոգեցունց է համարում։ Աննան իր տպավորությունների մասին պատմել է Sputnik Արմենիային։
Նրա խոսքով` հարազատ Եկատերինբուրգում հայ ընկերներ շատ ունի, այդ պատճառով էլ Հայաստան կատարած այցելությունը պատահական չի եղել։
«Հայաստանում մարդիկ շատ ջերմ են ու հյուրընկալ, ու դա զգացվում է յուրաքանչյուր քայլափոխի։ Ես եղել եմ Էջմիածնում, ինձ համար անչափ սրտամոտ ուղևորություն էր, քանի որ ես նույնպես քրիստոնյա եմ։ Մենք եղանք նաև Փարաջանովի տուն-թանգարանում։ Դա առանձին պատմություն է։ Նա հանճարեղ մարդ է եղել, հետաքրքիր անձնավորություն», — ասել է Աննան։
Հայկական խոհանոց
Հայաստանում ուտելիքի մասին կարելի է երկար խոսել։ Եկատերինբուրգից ժամանած ֆուդ-բլոգերը «Պատրաստում է մայրիկը» խորագրով խոհարարական նախագիծ է վարում։
«Ես ուզում եմ վերականգնել ռուսական ժողովրդական ուտեստների մշակութային ժառանգությունը, շատ կցականայի, որ նաև մեր երեխաներն ապագայում պահպանեն ավանդույթները, մշակույթը, կենցաղը, սերն ու ընտանիքը։ Ես համտեսեցի Ուդոլի տոլման, հետո կարդացի, որ սա հին բաղադրատոմս է, որը շուրջ 1000 տարվա պատմություն ունի։ Ձեր զվարճանքի վայրերում շատ լավ ժամանակ կարելի է անցկացնել, մենք հայկական ժողովրդական երաժշտություն լսեցինք, համտեսեցինք տարբեր նախուտեստներ, այդ թվում նաև` բաստուրմա», — պատմեց բլոգերը։
Աննայի կարծիքով, Հայաստանում համեղ ուտեստներ են մատուցում գրեթե բոլոր ռեստորաններում։
«Բացի այդ, հայերն անդադար հյուրասիրում են, ուզում ես նորից գալ Հայաստան։ Ուղևորության առաջին օրը ես եղա ամենամեծ մթերային շուկայում։ Գնեցի համեմունքներ, ընդեղեն, չիր։ Սիրում եմ ձեր չորացրած լոլիկները։ Մի քանի տեսակ գնեցի, թեև դրանք տեղափոխելը դժվար է», — նշել է նա։
Որպես խոհարարական թեմայի շարունակություն` Աննան նշեց, որ ռուսական մեծ քաղաքներում շատերը մթերք գնում են սուպերմարկետներից, բայց այնտեղ վաճառվող միրգն ու բանջարեղենը ո՛չ համ ունեն, ոչ էլ հոտ։
«Իսկ այստեղ բոլոր մթերքները բնական համ ունեն», — ասաց Sputnik Արմենիայի զրուցակիցը։
Հայաստան. սպասում և իրականություն
Աննան տարիներ առաջ դիտել է «Բարեկենդան» մուլտֆիլմը և Հայաստանի մասին սխալ պատկերացում կազմել։ Այստեղ գալով` զարմացել էր, երբ տեսել է զարգացող երկիր` մայրաքաղաքի կենտրոնում գտնվող անկրկնելի գեղեցիկ հրապարակով։
«Ինձ դուր է գալիս, որ ձեր քաղաքում կարելի է զբոսնել և՛ ցերեկը, և՛ գիշերը։ Այստեղ անվտանգ է։ Բացի այդ, Եվրոպայի համեմատ, անսպասելի էր, որ խանութները գրեթե միշտ բաց են», — ասաց բլոգերը։
Աննային դուր են եկել նաև կավե նախշազարդ ամանները, ինչպես նաև հուշանվերները, որոնք նա իր հետ Եկատերինբուրգ կտանի։
«Դուր է եկել նաև այն, որ Հայաստանում բոլորը ռուսերեն գիտեմ։ Օրինակ` Հունաստանում մեզ համար դժվար էր, քանի որ մարդիկ անգլերեն չգիտեն, ռուսերեն նույնպես։ Եվ չգիտես, թե որ լեզվով հաղորդակցվես», — ասաց բլոգերը։
Զրույցի վերջում Աննան խոստովանեց, որ Եկատերինբուրգում կփորձի «Ուդոլի» պատրաստել, թեև բարդ գործ է։ Բացի այդ, նրան դուր է եկել սմբուկով պատրաստված հայկական ուտեստը, որն նա անպայման կպատրաստի տանը։
