ԵՐԵՎԱՆ, 27 սեպտեմբերի — Sputnik. Օրիգինալ դիզայներական լուծում. վիշապագորգի խճանկարը կզարդարի Երևանի կենտրոնը։ 900 հազար կտոր քարից բաղկացած խճանկարային գորգն այսուհետ գտնվելու է Երևանի հյուրերի և բնակիչների ամենասիրված վայրում, Sputnik Արմենիային է հայտնել Megerian Carpet New York–ի տնօրեն Հովիկ Ջոն Մեգերյանը։
«Ընտանիքս, քաղաքապետարանի հետ համատեղ, որոշել է այնպիսի ծրագիր իրականացնել, որը կնպաստի հայկական մշակույթի զարգացմանը և հայկական գորգագործության տարածմանը։ Վիշապագորգը հայկական գորգագործության մեջ ամենաթանկարժեք գորգն է։ Զբոսաշրջիկներին այս հանգամանքն, անկասկած, կհետաքրքրի», – ասել է Հովիկը։
Նրա խոսքով` այս գորգը Մեգերյանների ընտանիքի նվերն է քաղաքին։
«Տարբեր երկրների ներկայացուցիչներ միշտ ցանկացել են գողանալ մեր գաղափարները, մշակույթը, սակայն ժամանակն է պահել ու պահպանել մեր ժառանգությունը։ Չէ՞ որ սա փոխանցվելու է հաջորդ սերունդներին», – ավելացրել է նա։
Զբոսաշրջիկները հնարավորություն կունենան ոչ միայն ուսումնասիրելու «Վիշապագորգը», այլև ծանոթանալու նրա պատմությանը, հասկանալու, թե որքանով է այն կարևոր մեզ համար. գորգի մոտ հատուկ ցուցատախտակ է տեղադրված լինելու, որի վրա նկարագրություն և հետաքրքիր մանրամասներ են զետեղված լինելու հայկական գորգագործության պատմության մասին։
Երևանի քաղաքապետի խորհրդական, Երևան քաղաքի գլխավոր դիզայներ Գագա Ամատունին էլ նշել է, որ ի սկզբանե առաջացել էր այլ մտահղացում` Երևանը զարդարել խճանկար գորգով: Այնուհետև նախաձեռնության հեղինակները եկել են այն եզրակացության, որ պետք է ներկայացնեն ամենահին գորգը։
«Մենք որոշեցինք, որ ամենահին գորգը պետք է լինի։ Մեգերյանի և քաղաքապետարանի համագործակցության արդյունքում նման հրաշալի աշխատանք հայտնվեց, որը նվիրեցինք մեր մայրաքաղաքին», – ասաց դիզայները։
Վիշապագորգի խճանկարը պատրաստվել է շուրջ 900 հազար կտոր քարերից, որոնք ներառում են մարմար, գրանիտ, ազուրիտ, տուֆ-ավազաքար:
Վիշապագորգի խճանկարի բացման հանդիսավոր արարողությանը ներկա էին քաղաքապետ Տարոն Մարգարյանն ու Հայաստանում ՌԴ արտակարգ և լիազոր դեսպան Իվան Վոլինկինը։
