ԵՐԵՎԱՆ, 27 սեպտեմբերի — Sputnik, Արմենուհի Մխոյան. Շիրակի պետական համալսարանի դասախոսներ Հովհաննես Խորիկյանն ու Գագիկ Համբարյան խոսքերով՝ բաց նամակի անհրաժեշտությունը վաղուց էր առաջացել, երբ պարզ դարձավ, որ ինստիտուտի՝ տարիների ընթացքում տնտեսած գումարն անհարկի ծախսվել է, բացի այդ ռեկտորն աշխատանքի է տեղավորել իր մտերիմ շրջապատի մարդկանց և բարձր աշխատավարձ սահմանել իր ու վարչական մյուս աշխատողների համար, փոխարենը դասաժամերից զրկվել են վաստակաշատ դասախոսներից շատերը:
«Դասերը թերբեռնված կուրսերում են իրականացվում, շաբաթական ծանրաբեռնվածությունը մեզ մոտ 12 ժամ է, անցկացվում է Հայաստանում գոյություն չունեցող ինտեգրված ուսուցում, իսկ հեռակա բաժնում դասավանդելու դիմաց դասախոսը ոչ մի լումա չի ստանում, այն դեպքում, երբ պարոն ռեկտորը ուսանողներից գանձում է ամբողջ վարձավճարը»,- Sputnik Արմենիային ասացին դասախոսները՝ ավելացնելով, որ որոշ աշխատակիցներ, օրինակ` վարորդները կամ հսկիչն ու օգնականը, ավելի բարձր աշխատավարձ են ստանում, քան դասախոսները:
Դասախոսների` ՀՀ նախագահին ուղղված բաց նամակը քննարկվեց գիտական խորհրդում, որից հետո հայտարարություն ընդունվեց (միաձայն):
Գիտական խորհրդի 29 անդամից նիստին մասնակցում էին 25-ը: Նիստի մասնակիցները վրդովմունք արտահայտեցին այդ նամակում տեղ գտած կեղծ փաստարկների վերաբերյալ՝ ընդգծելով, որ այդ նամակում նշված բոլոր որոշումներն ընդունել է գիտխորհուրդը, որի անդամ և նամակի համահեղինակ Հովհաննես Խորիկյանն այդ որոշումներին երբևէ դեմ չի քվեարկել:
Ի աջակցություն Խորիկյանի, բուհի պատմաբանասիրական ֆակուլտետի ուսանողները (ամբիոնի վարիչի ժամանակավոր պաշտոնակատար Հովհաննես Խորիկյան) դասադուլ են հայտարարել։
«Մենք դեմ ենք ուսումնական պլանի փոփոխությանը, քանի որ այն չի ծառայում կրթության որակի բարձրացմանը, կրթական վերջնարդյունքների ապահովմանը, քանզի անիմաստ ենք համարում նույն առարկաների բազմակի ուսուցանումը»,- Sputnik Արմենիայի հետ զրույցում ասացին ուսանողները` ներկայացնելով իրենց խնդիրները:
Այս ամենին ի պատասխան ռեկտոր Սահակ Մինասյանը երեկ` սեպտեմբերի 27-ին, հանդիպեց լրագրողների հետ ու փաստեց՝ բաց նամակում բերված փաստարկները բուհի բարեփոխումներին միտված միջոցառումները խեղաթյուրված ներկայացնելու փորձ են. ավելին՝ այս ամենը բուհի զարգացումը, կարգուկանոնը, ուսանողակենտրոն և բարձրորակ կրթական միջավայրի հաստատումը խոչընդոտելու փորձ է:
Ըստ նրա` գումարները ծախսվել են նպատակային, համալսարանի՝ վերջին 1 տարվա տեխնիկական վերազինումը, շենքային պայմանների բարելավումն ակներև են, և նույնիսկ վերջին 10 տարում իրականացված բարեփոխումների հետ անհամեմատ: Իսկ կրթական համակարգում իրականացվող բարեփոխումների արդյունքում 2017-2018 ուստարում, երբ հանրապետության գրեթե բոլոր բուհերում ուսանողների թվաքանակը նվազում է, ՇՊՀ-ում անցած տարվա համեմատությամբ առաջին կուրսեցիների թիվն ավելացել է շուրջ 100-ով: Աշխատավարձերը ևս մյուս բուհերի համեմատ բարձր է:
Վերադառնալով պատմության ամբիոնին` ռեկտորը նշեց. «Ամբիոնում խնդիր կա, և դա փաստ է։ Չեմ կարող ասել, որ այդ խնդիրը կապված է միայն ամբիոնի վարիչի հետ: Խնդիրը սկիզբ է առել մինչ իմ պաշտոնավարումը՝ ամբիոնի վարիչի ընտրություններին: Ցավոք, չենք կարողացել համակողմանի լուծումներ առաջարկել, բայց որ ամբիոնում խնդիր կա, հաստատ է, որը համոզված եմ` կլուծենք»:
Գիտական խորհուրդը ամբիոնի վարիչի պաշտոնակատար չի նշանակում և չի ազատում, այլ կարող է միայն կարծիք ու միջնորդություն ներկայացնել:
Ռեկտորը չթաքցրեց նաև իր աշխատավարձի չափը՝ նշելով, որ ինքը 700 հազար դրամ չի ստանում, այլ մոտավորապես 500 հազար:
